«Алтынла» бла къайтхандыла

Озгъан ыйыкъда Надым шахарда «Надымгазпром» организацияны биринчи директору В. Стрижовну хурметине тёрели бокс турнир ётгенди. Быйылгъы XX эришиулеге россейли спортчула бла бирге Белорусияны эм Къыргъызстанны келечилери да къатышхандыла. Рингге чыгъып, кючлерин кёргюзтген жашланы бла къызланы саны 70 жете эди. 16-17-жыллыкъланы араларында ётген турнирге бабугентчи боксчула Сараккуланы Сафар бла Аккыланы Амин да къатышхандыла. Жашла «Бабугент» спорт клубда тренерле Герийланы Хусейде бла Сараккуланы Ренатда жарау этедиле.

Эки кюнню ичинде «Арктика» спорт школну рингинде 45 тюбешиу бардырылгъанды. Сараккуланы Сафар, кеси ауурлугъунда (63кг.) эрише, финалгъа жетгенди. Анда уа таулу жашха Ямало-Ненец АО-ну чемпиону Никита Мирошниченко бла тюбеширге тюшгенди. Бабугентчи боксчу бу тюйюшде да кючлюрек болуп, «алтынны» ычхындырмагъанды.

46 килограмм ауурлукъда эришген Аккыланы Амин да, бир сермешде да хорлатмай, финалгъа чыгъады. Бу къауумда да Къабарты - Малкъарны келечиси алтын майдалны къытады.