Аяулу болургъа, ахчаны сагъыш этип жояргъа керекди

Тёреде болуучусуча, жангы жылгъы байрамланы аллында аш-суугъа багъала ёсериклерин айтадыла экономистле.

1 декабрьден жашау журт-коммунал жумушлагъа тёлеуле ёсгендиле, аны бла бирге уа байрамны кезиуюнде адамла бютюнда излеген продуктла багъа боллукъларын айтадыла экспертле. Бютюнда уа чабакъны, ырхызны багъалары кётюрюллюклерин айтадыла – 10-15 процентге. Аны бла бирге чагъыргъа, коньякга, башха ичгилеге да къошуллукъду. Тахта кёгетле 5 процентге кёбейириклерин белгилейдиле экономистле.

- Жангы жылда бизнес адамла кёп сатып алгъан затланы багъа этерге кюрешедиле: ичгини, чабакъны, къакъ этни. Ала бла бирге тыш  къыралладан келтирилген товарланы багъалары да ёсерикди. Ол а битеудуния къытлыкъ бла да байламлыды: жюклени ташыу багъа болгъаны бла,-дейди экономист Игорь Строганов.

 Законлагъа кийирилген тюзетиуле ючюн да ёсерге боллукъдула багъала. Ол санда хайырланыргъа жараулу болжаллары бошалгъан ашны, сууну  сатыугъа кийирилген чекле бла байламлы. Сатыучула къоранчларын азайтыр мурат бла багъалагъа алгъанда да къошаргъа боллукъдула.

Аш-суу бла бирге юйде хайырланнган техниканы, телефонланы, машиналаны да багъалары тюрленирикди. Экономистлени айтханларына кёре, ол жюклени ташыуда къоранчла ёсгенлери эм битеу дунияда да аллай затланы сатып алыргъа сюйгенлени саны азайгъаны бла байламлыды.

 - Юйде керекли тюрлю-тюрлю техниканы чыгъаргъанла да къоранчларын артха къайтарыргъа излейдиле. Сёзге, смартфонлагъа быйыл бек аздан 30 процент къошулгъанды,  алай аланы къурамлары алышынмагъанды, бирлери уа аны аллында жыллада чыгъарылгъанладан осал окъунадыла,-дейди экономист Игорь Строганов. 

 Алай бла экспертле байрамланы аллында эмда келир жыллада  ахчаны аяулу жояргъа, аберини сатып алгъынчы уа, аны керек болгъаныны бла къалгъаныны юсюнден сагъыш этерге чакъырадыла.