Ток къыркъылгъан жерледе иш къазауатды

Бу кюнледе республикада иги да сууукъ болгъанды. Хауаны температурасы артыкъ энишге тюшмегенликге, мылылыкъ бла желле сууукълукъну бек сездиредиле. Кёп жерледе жолланы буз басханды, талай районлада электрокюч ызланы чыпынлары аугъандыла, чыбыкълары да юзюлюп тюшгендиле. Аны себепли «Россети Шимал Кавказ» компанияны регионда бёлюмю энчи халда ишге кёчюрюлгенди.

Бегирек да Зольск районда хал къоркъуу болгъанын белгилейдиле компанияда. Анда бийик вольтлу ызланы буз жабышып юзеди. Ремонт ишлеге кёп специалист къатышады. Коллегаларына болушлукъгъа Къарачай-Черкесден, Ставрополь крайдан эмда Шимал Осетиядан специалистле да жетгендиле. Керек болса, энттада адам табыллыкъды, деп ышандыргъандыла компанияда. Битеу да жюзге жууукъ энергетик къармашады. Техника да кёпдю.

«Зольск районда хауаны болуму энчиди дерчады. Терк-терк уруп тургъан желле, мылылыкъ, аланы юсюне сууукъла да къошулуп, ток ызланы олсагъат къалын буз бла тышлайдыла. Энергетикле аны къагъып тюшюредиле, энчи оборудованияны хайырланып эритедиле, чыпынланы сюейдиле, ток ызланы жангыдан къошадыла, электрокюч бла жалчытыу тыйгъычсыз болур ючюн аямай кюрешедиле», - дегенди компанияны баш инженерини орунбасары Андрей Гончаров.

Энергетика объектлеге хата жетгенин неда ток юзюлгенин кёрсегиз, 8-800-220-0-220 номер бла сёлешип билдиригиз.