«Устазлыкъ сабий заманымдан келген муратымды»

Элбрус районну Сабий эм жаш тёлю чыгъармачылыкъны айнытыуну Мокъаланы Магомет атлы арасыны эм иги устазларындан бири  Байзуллаланы Заремады. Ол «Медицина бла биз» деген биригиуню башчысыды, анда юйреннген сабийле терен билим алгъанларындан тышында, тюрлю-тюрлю эришиулеге дайым къатышадыла, хорлагъан да этедиле.

- Школну бошагъанлай, Нальчикде медицина училищеге киргенме, - дейди Зарема Малиловна. – Андан сора направление бла Тырныауузгъа тюшгенме, терк медицина болушлукъ этиу службада фельдшер болуп ишлегенме. Арагъа уа къадар келтиргенди: жер-жерли газетде сабийлени медицинагъа юйретирге педагог керек болгъаныны юсюнден билдириуню кёрюп, кесими устазлыкъда сынаргъа сюйгенме. «Билим бериу эм педагогика» жаны бла профессионал хазырланыуну ётгенме, медицина службада ишими къоюп, сабий чыгъармачылыкъны дуниясына къошулгъанма. Аны ючюн къадарыма бек ыразыма, ачыкъ айтханда, устазлыкъ ол сабий заманымдан келген муратымды. Бюгюн да гитчеле бла ишлеу манга хычыуунду, зауукълукъ береди. Аланы къууаннган, «жаннган» кёзчюклерин кёрген манга уллу насыпды.

Кесини да медицинагъа тартылгъаны педагогга сабийлени да бу ишге сейирлерин къозгъаргъа болушады. Бусагъатда «Медицина бла биз» биригиуде беш къауум юйренедиле, аланы хар биринде онбешишер сабий киреди. Бир къауум илму-излем иш бла кюрешеди, ары жети бала жюрюйдюле. Кабинетде битеу керекли техника оборудование барды, программа эм дидактика материал жыйышдырылгъанды. Араны башчылары айтханнга кёре, сабийле бери сюйюп келедиле.

Сабийле, педагог бла ата-анала бир бирлери бла дайым байламлыкъда тургъанларын да белгилерчады. Аны хайырындан гитчеле тюрлю-тюрлю конкурслада бла илму-излем конференциялада хорлайдыла, быйылгъы окъуу жыл да кёп жетишимлеге бютюн бай болгъанды. Сёз ючюн, Къалабекланы  Азрет-Алий школчуланы араларында бардырылгъан «В.И. Вернандскийни хурметине окъуула» деген XXII республикалы  илму коференцияны «Медицина эм саулукъ» номинациясында биринчи даражалы дипломну алгъанды эм лауреат болгъанды. Ол хазырлагъан материалланы XXIX жаш тёлю излем ишлени битеуроссей конкурсуна иерге эсгертиу этилгенди. Азрет-Алий да, Энейланы Салимат да Обнинскде «Жашлыкъ. Илму. Маданият» деген битеукъырал конкурсда экинчи даражалы дипломла алгъандыла. 5-8-чи классланы окъуучуларыны араларында къуралгъан «Сигма» - «Илмугъа биринчи атламла» илму конференцияда Балаланы Талифа хорлагъанды. Дагъыда Талифа бла Макытланы Джамиля Илмуланы гитче битеуроссей академиясыны «Боллукъ заманны интеллекти» - «Къонакъбай Кавказ» VI краеведение турнир-конференциясыны «Медицина эм саулукъ» номинациясында биринчи даражалы лауреатла болгъандыла.

Байзуллаланы Зарема айтханыча, быллай эришиулеге къатышыу адамгъа фахмусун ачыкъларгъа, кесин сынаргъа, усталыгъында ёсерге онг береди. «Сабийле кёп адамланы аллында сёлешиуде уллу сынам алгъандыла, башха конкурсантланы ишлерин тинтиуге къатышхандыла. Хау, жарсыгъан, адыргы этген такъыйкъала чыкъгъан да болурла, алай ала салыннган борчланы ахшы тамамлагъандыла», - дейди ол.

«Медицина эм биз» биригиуге Байзуллаланы Зарема башчылыкъ этгенли 16 жыл болады, хар устазныча, аны да кесини муратлары бардыла. Ол чертгенича, эм башы окъуучулагъа сейир чыгъармачылыкъ, излем ишни бардырырча, кеслерин кёргюзтюрча онгла къураргъады, ала сайлагъан усталыкъларын, медицина ишни сюерча, саулукълу жашау бардырыргъа кюреширча этергеди.

Суратда: Байзуллаланы Зарема окъуучусу Къалабекланы Азрет-Алий бла.