Жууаплылыкъны юсюнден сёлешгендиле

Нальчикни отуз ючюнчю номерли мектебини мурдорунда шахарны Билим бериу департаментини келечилери ата-аналаны битеулю жыйылыуларын бардыргъандыла. Ол а «2023 жылда тогъузунчу-онбиринчи класслада къырал эсеп аттестацияны къурау эмда бардырыу» деген темагъа жораланнганды.

Жыйылыугъа эки жюзден аслам адам къатышханды. Тюбешиуню кезиуюнде сагъынылгъан департаментни башчысыны къуллугъун толтургъан Алим Мальбахов сёлешгенди. Ол, келир жылда къырал эсеп аттестацияны юсюнден айта, ол кезиуде болургъа тийишли низамны юсюнден эсгертгенди. Аны бла бирге уа устазланы, окъуучуланы, ата-аналаны да жууаплылыкъларын белгилегенди.

Къайсы сынау да сабийге психология жаны бла тынч болмагъанын къатлай, ЕГЭ-ни аллында аланы къоркъгъанларын, абызырагъанларын азайтыу жаны бла ишлерге да чакъыргъанды. Андан сора да, педагогла, ата-анала да жаш адамланы кёллендирирге, къоркъутмазгъа, ала жетишимли болурларын айтып кёллендирирге тийишлисин да ангылатханды. Аны бла бирге уа алагъа тынгылы болумла къураргъа кереклисин айта, окъуучулагъа алгъадан да сынаулада низамны юсюнден билдирирге, алагъа аны бла байламлы къатылыкъла нек этилгенлерине да тюшюндюрюрге тийишлисин чертгенди.

Андан сора да, жыйылыуда КъМР-ни Жарыкъландырыу эмда илму министерствосуну билим бериуню даражасыны мониторинги эмда окъуучуланы аттестациялау бёлюмюню келечилери, педагог-психологла да сёлешгендиле. Ала да асламысында сабийлени психология-къылыкъ жаны бла байламлы проблемаладан сакълауну юсюнден айтхандыла эмда ата-аналаны, устазланы да бу жаны бла жууаплылыкъларын, ала этген болушлукъну къыйматын да ангылатхандыла. Ызы бла уа ала соруулагъа жууапла да бергендиле.