Поликлиникала жангы мардалагъа келиширикдиле

Бу кюнледе «Саулукъ сакълауну биринчи звеносун жангыртыу» регион программагъа кёре, Вольный Ауул микрорайонну  1-чи номерли поликлиникасына  тынгылы ремонт этиле турады. Анга  1986 жылдан бери тынгылы къаралмагъаны ючюн ол иги да  тозурагъан эди.  Бюгюнлюкде мекямны башында къанжалларын, терезелерин, эшиклерин, полун, жылытыучу системасын, ток чыбыкъларын, вентиляциясын алышхандыла эм кабинетлени да жангыртхандыла.

Учрежденияны экинчи эм ючюнчю этажларында участковый врачла эм башха специалистле  олтурлукъдула. Тиширыулагъа консультация бардыргъан бёлюм да къураллыкъды. 

Поликлиникагъа жангы цифралы оборудование: флюорограф, электрокардиограф, рентген-аппарат сатып алгъандыла, жууукъ заманда  маммограф да келтирилликди.

Биринчи этажда процедура, прививка этген эм биринчи медицина болушлукъ тапдыргъан,   ЭКГ,  флюорография эм  рентген кабинетле да  ачыллыкъдыла.  Ол санда ОРВИ-лери болгъанла эм башха  жукъгъан аурууладан къыйналгъанла бирсиледен башха сакъларча мадар къураллыкъды.
 

Планнга кёре, объект жылны ахырына битерге керекди.

Чегемни  ара поликлиникасына да «Саулукъ сакълау»  миллет проектге эм  «Саулукъ сакълауну биринчи звеносун жангыртыу» регион программагъа кёре  тынгылы ремонт этип бошай турадыла.  Ишлеге саулай да 14,9 миллион сом къоратыллыкъды.  Ахча толусунлай федерал бюджетден бёлюннгенди.

Бусагъатда ишлени кёбюсю этилип бошалгъанды. Ол санда юй башында къанжалларын алышып бошап,  ичинде суу  быргъыланы, ток чыбыкъланы, терезелени, эшиклени, полларын да жангыртхандыла.  Ичинде эм тышында да къабыргъаларын  сюртгендиле. 

Поликлиникада  кесекледен, башха жукъгъан аурууладан къыйналгъанла эм уллу температуралары болгъанла бирсиледен башха  сакъларча схема ишлерикди.   

Энди  медицина профилактика, сабий эм  акушер-гинекология бёлюмле да башха корпуслагъа кёчюрюлгендиле.  План бла  поликлиниканы ара эшиги орналагъан жерни омакъландырыргъа, сабий бёлюмде перевязка этген  кабинет къошаргъа, арбазны айбатландырыргъа, ол санда темир бурууланы башхаларана алышыргъа эм тийрени да тапландырыргъа  мурат этиледи.  

Бюгюнлюкде поликлиника районда жашагъан  69485 адамгъа къарайды. План бла сменагъа   670 саусуз келирге боллукъду.  Кюндюз стационарында да  бир жолгъа 81 жатарча жерле бардыла.   

«Саулукъ сакълауну биринчи звеносун жангыртыу» регион программагъа кёре,  Къашхатауну район  аралы поликлиникасына  да тынгылы ремонт этиле турады. Анга отуз жылны ичинде бир да тынгылы къаралмагъанды.  Мында  план бла  сменагъа  350 адамгъа къарарча онг барды.

Бусагъатда объектни ючюнчю эм тёртюнчю этажларында ишле тамамланнгандыла. Специалистле инженер  коммуникацияланы, лифтлени, терезелени, эшиклени жангыртып бошагъандыла.

Бюгюнлюкде специалистле  биринчи эм экинчи этажда эм  арбазда жумушла бла кюрешедиле. 
Медицина учреждение, ремонт баргъанына да къарамай, ишин тийишли халда толтурады.

Ишлени  саулай быйылны ахырына бошар  мурат этиледи.