Насыбынгдан ачхычланы биреуге да ышанма

Жангызлыкъ…Бу сёзню магъанасын хар ким да кесича ангылайды.  Тиширыула бла байламлы ол   бютюнда эс бёлюрча темады дерге боллукъду. Жашауу хар кимни да энчи къуралады. Бирле эрге барып да кеслерин жангызлай сезедиле. Башхала уа жангызлай да насыплыдыла.

Айтханларына кёре, жангызлыкъ сынагъанла юч тюрлюге юлешинедиле. Бу жарсыу бла кюрешген алимлени оюмларына кёре, биринчи къауумгъа жангыз болгъанлыкъгъа, андан насып сезгенле киредиле. Экинчилери жангызла эм аны себепли кеслерин насыпсызлагъа  санагъанладыла. Ючюнчюлери уа насыпсызла, алай халкъны аллында аны букъдурургъа кюрешип, кеслерин насыплы кёргюзтюрге итиннгенледиле.

Жангызлыкъ тиширыуну, эр кишини да ичинден ашайды десек, ётюрюк болмаз. Бютюнда ол жылла бла тюрленмеген болум эсе уа – бютюнда.  Эр киши кесини жашаууна кеси ие болгъанлыкъгъа, тиширыуну аллай онгу болмайды. Аны юйюнден ата-ана ыразылыкъсыз  ары-бери кетип жашауун тюрлендирир амалы жокъду. Отуз жылларына дери жангызлай тургъан къызларыбызны асламысыны усталыкълары эрттенден ингирге дери тышына чыкъмай уруннган иш  бла байламлыды. Ол себепден аланы кеслерин кёргюзтюр, танышып жашауларын къурар онглары болмайды. Шёндюгю жашауда телефон, социальный сетьле болсала не жарсыу, дегенле да чыгъарла.  Алай ала бла хайырланыргъа таукел болгъанла да аздыла. Быллай хал а онжыллагъа созулуп да кетеди. Сора жыл саны отуздан атлагъан тиширыу тынчлыкъгъа юйренип, кесин башха жумушла бла къыйнаргъа сюймей башлайды. Заман а тохтаусуз барады… Бизнича аз санлы халкъда быллай зат жюрюмезге керекди деп, сагъышым алайды. Хар бирибизни да жууугъубузда бла ахлубузда да бардыла юйюрсюнмей тургъан жетген жашла бла къызла. Кесигиз сагъыш этигиз, бир юйюрде аллай экеулен болса окъуна, миллетибизни санына бек аздан 3-4 сабий къошулмай къалады.

Тиширыуланы юслеринден энчи айтханда, былайда эрде болуп, алай юйюр жашауда да жангызлыкъны сезгенлей тургъан къауумда энчи тохтарчады.  Той  азда болушалмаз, арада сюймеклик болмай  къуралса юйюр. Эрде болгъан кёп тиширыула кеслери алларына жашагъанлагъа сукъланадыла дерчады. Анга юлгюле да аз тюйюлдюле жашауда. Баш ие бла аллындан окъуна ара тап болмаса, артда тюзелмез. Ол а юйюрню  чачыллыгъыны биринчи белгисиди. Жаш бла къыз бир бирлерин игирек таныргъа керекдиле деп сагъыш этеме. Хау, адамны биргесине жашап тебирегинчи, халини хар жашырынына да тюшюнюр амал жокъду. Болсада араларында бир бирге тартындыргъан сезим болургъа керекди неда сейирле. Ансыз экисини да жашаулары башха-башха ётерикди. Аллай болумда сабий окъуна болушмайды. 

Аны себепли омакъ эм бай той хар неден да сакъларыкъ сунуу - алдауукъ оюмду. Аны ангыларгъа керекди. Аллай юйюр жашауда тиширыуну психикасына да заран жетмей къалмайды. Кёплеге специалистлеге жюрюп, энчи багъыу алыргъа да тюшеди. Алай сабий тууса, хар неда тап болур деп ийнанып жашагъанла да аз тюбемейдиле.  Кертисин айтханда, жюрекни къууандыргъан тюрлениуле ол шарт бла келип да къалмайдыла. Аны себепли, тиширыу кеси жашаууна алгъадан да ие бола билирге керекди. Насыбындан ачхычланы биреуге ышанмазгъа. Ол а неди? Бек биринчиден, этген атламын сюзюп, артда не да тап болур деген сагъышладан кери къалып. Алгъадан жалгъанмагъан артда да тутулмаз. Эр киши, юйюр жашау да тиширыугъа насыплы жашауун андан да насыплы этерге деп бериледиле.  Ол затны бир заманда да унутургъа керекмейди. Жангызлай къалыргъа къоркъгъандан эссизлик этерге да жарамайды…