Бахсан сууну ызын тазалайдыла

Бахсан сууну Элбрус районда кесегинде ызын ташладан бла юзмезден тазалау ишле барадыла. Анга кёп къалмай 250 миллион сом къоратыллыкъды. КъМР-ни Табийгъат байлыкъла эмда экология министерствосундан билдиргенлерине кёре, бу иш «Экология» миллет проектге кирген «Болмагъанча аллай суу объектлени сакълау» деген федерал проектни чеклеринде бардырылады.

Алай бла быйылны ахырына дери бу сууну ызны 2,6-километрлик участкасын тазаларыкъдыла. Келир жыл 5,2 километрде мадар этилликди, 2024 жылда уа 5,2-километрлик кесеги тап халгъа келтирилликди, дегендиле министерствода.

Жылны бу кезиуюнде Бахсан суу селейирек болады, аны себепли иш да женгилирек барады. Ол тамам этилгенден сора, беш минг чакълы адамны экология жаны бла жашау болумлары игиленирикди.

Бахсан суу Азау чыранладан башланады. Кеси да бизни республикада беш районну ичи бла барады. Дагъыда ол энчи къорууланнган «Приэльбрусье» миллет паркны тийресинде ётеди. Бу сууда чабакъны багъалы тюрлюлеринден бири (кумжа) да барды.

Эсге сала айтсакъ, сагъынылгъан федерал проект, «Экология» миллет проектни санына кирген онбиринден бириди. Ол 2019 жылда 1 январьда башланнганды, 2024 жылда 25 декабрьге дери бардырыллыкъды. Аны магъанасы суу объектлени сакълау, череклени ызларын эмда аланы, сора дагъыда кёллени жагъаларын кир-кипчикден тазалау бла байламлыды. Ол бары да экологияны эмда адамланы жашау болумларын игилендирир хыйсап бла этиледи.