Машиналары, праволары да сыйырылгъандыла

«Кеф водитель» кезиулю энчи жумушланы кезиуюнде эсирип руль артына олтургъан эмда машинаны жюрютюрге эркинликлери болмагъан 37 водительни ачыкълагъандыла жолда жюрюуню къоркъуусузлугъуну инспекторлары. 32 машина сыйырылып, энчи жерге салыннгандыла.

Алай бла 14 водитель жолгъа эсирип чыкъгъандыла, бир-бирлери медицина тинтиуледен ётерге унамагъандыла. 22 инсанны уа транспортну жюрютюрге энчи эркинликлери сыйырылыпды неда ахыры бла да жокъду.

Полициячыла  жолда жюрюуге къатышханланы барысын да жорукъланы  сакъларгъа чакъырадыла, кеф эмда медицина тинтиуледен ётерге унамагъан  водительле машинаны жюрютюрге эркинликни 2 жылгъа тас этерге боллукъларын эсгертедиле. Аны бла бирге 30 минг сом тазир салынады. Эсирип тургъанлай, жолда дагъыда тутулгъан а 200-300 минг сом  тёлерге хазыр болургъа керекди, правалары 2 жылгъа сыйырылыргъа боллукъдула. Неда бузукъчу борчлу халда хакъсыз ишлеге тартылады – 480 сагъатны. Дагъыда сюд  бир тюрлю иш бла юч жылны ичинде кюрешмезге деген оноуну чыгъарыргъа да боллукъду.

РФ-ни Административ бузукълукъланы кодексини 12.7-чи статьясыны 4-чю кесегине тийишлиликде, машинаны жюрютюрге эркинлиги сыйырылып, анга бойсунмай, руль артында тутулгъаннга  тазир салынады – 50-100 минг сом, неда ол хакъсыз ишлеге тартылады – 150-200 сагъатха.

РФ-ни УК-сыны 264.3-чю статьясыны 1-чи кесегине тийишлиликде, башында белгиленнген статьягъа кёре административ жууапха тартылып, жангыдан машинаны  жюрютген кезиуде тутулгъан инсан уголовный жууапха тартылады. Тазир 150-250 минг сомгъа жетеди, неда бир жылны хакъсыз ишлерге тюшерикди. Аллай бузукъчуну эркинлиги бир жылгъа сыйырылыргъа да боллукъду.

Хурметли окъуучула,  водитель кеф болгъанын билсегиз неда жолда биреу кесин тапсыз жюрютюп, башхаланы саулукъларына, жашауларына къоркъуу салгъанын кёрсегиз, аны право низамны сакълаучулагъа  белгили этмей къоймагъыз, бу телефон номерлеге сёлешигиз: 8 (8662) 49-50-62, 96-10-00, 91-10-96, неда 102.

Жолда жюрюуню къоркъуусуз этер, анга къатышханла ачымаз ючюн жамауат, право низамны сакълаучула да биригирге  кереклисин белгилейдиле полициячыла.