Жаш тёлю бла ишлеуню амаллары сюзюлгендиле

Бу кюнледе Элбрус районда КъМР-ни жаш тёлюсюню форуму бардырылгъанды. Аны къурагъанла КъМР-ни Жаш тёлюню ишлери жаны бла министерствосу, районну жер-жерли администрациясы эм билим бериу управлениясы болгъандыла.

Форумгъа жаш тёлюню ишлери бла кюрешген специалистле, сабий жамауат биригиулени башчылары, волонтёрла, РДШ-ны, Юнармияны келечилери да къатышхандыла.

- Бу форум жаш тёлюге жангы жолланы ачады. Ол районну жаш адамларыны айныуларына себеплик этерик майданды, - деп чертгенди, кесини къысха сёзюнде Элбрус районну жер-жерли администрациясыны таматасыны къуллугъун толтургъан Сотталаны Къурман.

Республиканы жаш тёлюню ишлери жаны бла министри Азамат Люев а министерство жууукъ заманда бардырлыкъ ишлени юсюнден хапарлагъанды эм алагъа тири къатышыргъа чакъыргъанды.

Форум юч майданда ётгенди. Алада жаш тёлю политиканы юсюнден соруула да сюзюлгендиле. Алагъа къатышханланы кеслерини сынауларындан билдириуле этер онглары да болгъанды.