Бек багъалы эм къаугъалы да чемпионат

Белгилисича, Футболдан дунияны 22-чи чемпионаты ахча къоранчла жаны бла аны тарыхында бек багъалыды. Битеу жоюлгъан ахча 200 миллиард доллардан артыгъы бла саналады. Анга дери бек къоранчлыгъа Бразилияда ётген саналып тургъанды- 16 миллиард доллар. 2018 жылда Россейде бардырылгъан 21 чемпионатха 11 миллиард доллар жоюлгъан эди.  Алай андан сора да, чемпионатны  Катарда ётдюрюрге деген оноуну тюзге санамагъанла 2010 жылдан бери кёп хапарла жюрютгенлей турадыла. Аладан бири бу къырал аллай бир халкъгъа къонакъбайлыкъ этерге асыры гитче болгъаны бла байламлыды. Сёз ючюн, Москва область бла тенглешдиргенде, Катар андан 4 кереге гитчеди.

Кертиси бла да, чемпионатха къараргъа келгенле (1,2 миллион адам), къыралны тийресиндеги къонакъ юйлеге сыйынмай, къоншу Сауд Аравияда тохтагъандыла. Ол а артыкъ тап болмайды адамлагъа. Нек дегенде, бир къыралдан экинчисине самолёт бла учаргъа тюшеди. Ол а туристледе кезиулю къоранчла туудурады. Келген къонакъланы саны къыралны кесинде жашагъанланы ючден бирин тутады.

Эсигизге салайыкъ, Катар бла бирге 2022 жылдагъы чемпионат ючюн конкурсха Америка да къатыша эди. Алай хорлам бу гитче арап къыралгъа тюшгенди.

Чемпионатны 92 -жыллыкъ тарыхында аны биринчи кере жаздан кюз артына кёчюрюрге тюшгенди. Нек дегенде жаз айлада анда иссилик +40 градусха жетеди. Ол а бу оюннга аз да келишмей эди. Шёндю да анда къызыулукъ 29 градусдан энишге тюшмейди. Ол окъуна асыры кёпдю.

Башха сылтауладан бирине уа Катарда бир тюрлю ичги жюрютюлмегени бла байламлыды. Аны жаланда ресторанлада сатадыла. Болсада чагъыр сатхан компанияладан бири бла чемпионатда сатыу бардырырча сёз тохташдырылгъан эди. Алай эришиуле башланырдан 2 кюн алгъа, къырал таматала сёзлеринден тайып, сатыу бардырыргъа жарамазлыгъын билдиргендиле. Энди ол чагъырны хорлагъан командагъа саугъагъа берирге деп келишимлик этилгенди. Катарны властьлары: « 28-кюнлюк спорт байрам ючюн биз динибизни, адет-тёрелерибизни да унутурукъ тюйюлбюз!» -деп жууап бергендиле аланы жорукъларына ыразы болмагъанлагъа.

Аллай кемчиликледен сора кёп запад къыраллада, сёз ючюн Данияда, чемпионатха къатышмазгъа дегенле да аслам болгъандыла. Алай властьла ол затлагъа ыразылыкъларын билдирмегендиле эм футбол командаларын чемпионатха ашыргъандыла. Данияны футболчуларыны кийимлерин жарашдыргъан компания аны дизайнын къысха заманны ичинде къараргъа тюрлендиргенди. Ол а стадионланы ишлегенде ёлген къурулушчуланы эсгериуню белгисиди, деп билдиргендиле ала. 

Журналистле бла байламлы да биринчи кюнден окъуна къаугъала туугъандыла. Алай бла Аргентинадан келген журналистканы, ол тюзюнлей эфирде болгъан кезиуде, ахчасын эм документлери бла сумкасын урлагъандыла. Полиция уа, ол тиширыу болгъаны себепли, заявлениясын алыргъа унамай кёп тургъандыла.

Бир-бир къыралла уа уллу шахарларыны орамларында экранла орнатыудан кери болгъандыла. Алай бла Франция чемпионатда «адамланы эркинликлерине сугъанакълыкъ этилгени бла байламлы» орамлада трансляцияланы бардырмайды. Башхала айтханнга кёре, аны сылтауу электрокючню керексиз къоратмаудады.

FIFA-ны таматасы Джанни Инфантино уа битеу кёлкъалдылагъа, Катарны властьлары жанлы болгъанды. Къыралны шейхи уа Тамим бин Хамад Аль Тани айтханнга кёре, бу турнир аланы экономика эм туризм жаны бла айныуларына себеплик этерине ышаныулукълары болгъанды. Алай запад къыралланы кеслерин жюрютюулерине кёре, ол муратла толмазгъа боллукъдула.