Жаш тёлю политиканы игилендириуге алланып

Кёп болмай КъМР-ни Жаш тёлюню ишлери жаны бла министерствосу къурап  Куба элни Маданият юйюнде жаш тёлю политиканы игилендириу  жаны бла форум болгъанды. Анга сагъынылгъан ведомствону таматасы Азамат Люев,  Бахсан районну администрациясыны башчысы Артур Балкизов,  онюч элден 180 активист эм башхала  къатышхандыла.

Жыйылыуну ача, Артур Балкизов районну, республиканы да социал-экономика жаны бла айныууна жаш тёлюню уллу къошумчулугъу болгъанын белгилегенди. Не заманда да районда жаш тёлю политикагъа аслам эс бурулгъанын, аланы ахшы  башламчылыкъларында къолларындан келгенича тутхучлукъ этилгенин  чертгенди эм тутхан ишлеринде жетишимле болдурурларын тежегенди.  

КъМР-ни жаш тёлюню ишлери жаны бла министр Азамат Люев да, айтылгъан сёзлеге къошула,  ведомствону ишини юсюнден хапарлагъанды. Ол санда аны баш борчларындан бири хунерли жаш адамлагъа болушуу, къыйматлы башламчылыкъларында тутхучлукъ этиу болгъанын  эсге салгъанды. Быллай  тюбешиулени  хайыры бла  элде жашагъанланы проблемаларын толуракъ   билирге онг табылгъанын да букъдурмагъанды.  

Конференцияны  байрам кесеги бошалгъандан сора жыйылгъанла тематикаларына кёре "Волонтёрла", «Россейни сабийлери бла жаш тёлюсюню тебиулюгю» деген билим бериу майданлагъа къатышыргъа  юлешиннгендиле. 

Форум баргъан чакъда Азамат Люев "Диалог на равных " формада жаш тёлю бла ачыкъ халда ушакъ этгенди. Министр алагъа  республикада кеслерини жерлерин табарча социал- экономика бёлюмлени юсюнден билдирип насийхатлыкъ да  этгенди.

Азамат Хасейнович айтханыча, экинчи жыл Нальчикде,  Черек эм  Урван  районлада уллу жаш тёлю арала къураллыкъдыла. Аны магъанасы шахарлада бла элледе жашагъан жаш адамланы башламчылыкъларында болушлукъ тапдырыргъады. 

Аны бла бирге министр жер-жерли   самоуправленияланы келечилерине   муниципал даражада  жаш тёлюню айнытырча  энчи программала къураргъа чакъыргъанды.

Форумгъа къатышханла магъаналы темаланы сюзерге, оюмларын, сынамларындан  билдирирге эм жетишимлерин ачыкъларгъа онг тапхандыла. 

Келир заманда быллай форумла республиканы муниципалитетлерини барында да ётерикдиле.