Шахарны орамлары тапландырыладыла

Къабарты- Малкъарда жамауат магъанасы болгъан жерлени тапландырыу ишле бардырыладыла. КъМР-ни Башчысы Казбек Коков Нальчикде Шогенов атлы орамны бир кесегине къарагъанды, ол жол «Дубки» микрорайоннга  эм «Восточный» жангы микрорайоннга элтеди.

Казбек Коковну билдиргенине кёре, ол орамгъа ремонт этилликди,  аны  2023 жылда жоллада ремонт бардырыу  бла байламлы тизмеге къошар ючюн шёндю проект-смета къагъытлары хазырлана турадыла. Жол толусунлай жангыртыллыкъды, эки жанында тротуарла боллукъдула, чыракъла жанарыкъдыла эм тёгереги айбатланырыкъды.

Шогенов атлы орам бла Малой орам бирге къошулгъан жерде жангы сквер ишленирикди. Алайда адамла солурча жерле, спорт эм ойнаучу майданла орналлыкъдыла, район саулай да тапландырыллыкъды.

 Республиканы оноучусуну буюурууларына кёре, больничный шахарчыкъ да толусунлай тапландырыллыкъды, нек дегенде аны ичинде къауум уллу медицина учрежденияла орналыпдыла.

«Бери кюн сайын республикдан эм къоншу регионладан жюзле бла адамла келедиле, былайы уллу жамауат магъанасы болгъан жерди. Аны себепли аны арсарсыз тапландырыргъа керекбиз», - деп чертгенди республиканы оноучусу.  Аны юсюнден КъМР-ни Башчысыны бла Правительствосуну пресс-службасы билдиреди.

Бизни корр.