Комбинатны къурулушун башларыкъдыла

РФ-ни Промышленность, энергетика  эмда сатыу-алыу министерствосундан билдиргенлерича,  экинчи  жыл Тырныауузда вольфрам-молибден чыгъаргъан жангы комбинатны къурушу башланырыкъды.

Ведомствода айтханларына кёре, келир жылда комбинат технология жаны бла да  жалчытылынырча бир къауум  оборудование  алынырыкъды. Къабарты-Малкъарны Башчысы Казбек Коков да проект, графикге кёре баргъанын белгилей,  комбинат кёп бармай  ишин башларыгъына ийннанганын билдиргенди. 

Комплексни жангыртыу бла  «Ростех» корпорациягъа кирген  «Эльбрусметалл» биригиу кюрешеди.  Жангы предприятияны кючю бир жылгъа 4,5 минг тонна вольфрам  эм минг тонна молибден оксид  чыгъарырча боллукъду. 

Эсге сала айтсакъ, бусагъатда  Правительствада  вольфрам эм молибден предприятияла табийгъат байлыкъланы хайырланнганларына налог (НДПИ) тёлемезча онг бериу да  сюзюледи. 

Проект жашауда бардырылса  Шимал Кавказда  эм уллу промышленный предприятие къураллыкъды. Проектни битеу багъасы 25 миллиард сомду. Бир жылгъа магъадандан 1,5 миллион тонна къазаргъа эмда жарашдырыргъа, 700 чакълы бир жангы ишчи жер ачаргъа белгиленеди. Комбинат  толу кюч бла 2026 жылгъа ишлеп башларыкъды. Республиканы бюджетине налогладан жыл сайын 300 миллион сом чакълы тюшерикди.

Промышленный ишлени эки инвестиция майданда бардырыргъа белгиленеди: Тырныауузда магъаданны къазып чыгъарлыкъдыла эмда байыкъландырлыкъдыла,  Невинномысскде уа  гидрометаллургия производство ачыллыкъды. Проектни чеклеринде жер тюбюндеги рудник жангыртыллыкъды, тийишли экология инфраструктура да къураллыкъды. Бюгюнлюкде Элбрус тау-магъадан комбинатны инвестиция майданларын энергоресурсла, газ эмда жолла бла жалчытыу жаны бла мадарла этиледиле. Къутхарыу ишлени къураугъа аслам эс бурулады. 

Проектни стратегия магъанасы барды. Вольфрам бла молибден – аз тюбеген автомобильле, самолётла чыгъарыуда, нефть жарашдырыуда, къоруулау промышленностьда эм башхалада да хайырланыладыла. Вольфрамы болгъан сырьёну къазыу эмда аны жарашдырыу Россейни экономикасында  импортну алышындырыуну борчун толтурууда да  уллу магъананы тутады.