Онтёрт мектепге тынгылы ремонт этилгенди

КъМР-ни Башчысы Казбек Коков «муниципал сагъатны» бардыргъан кезиуде, республиканы муниципал къаралыуларында къырал программала бла миллет проектле къалай бардырылгъанларына къарагъанды. Белгиленнгенине кёре, быйылгъы жылда муниципалитетледе бардырылгъан миллет проектлени асламысы быйылгъы жылда тамамланып бошалгъандыла. Бюгюнлюкде «Маданият жумушла» федерал проектни чеклеринде шахарлада шёндюгюлю болумла къурау жаны бла ишле тамамланадыла.

«Таза суу» регион проектни чеклеринде къошакъ халда берилген  ырысхыланы  хайырындан, республиканы районларында суу баргъан быргъыланы алышындырыу жумушла бардырыладыла.   

Инсанланы оюла тургъан юйледен кёчюрюу программагъа кёре, ол ишлени тамамларгъа, федерал ырысхыладан сора да, 2022 жылда регион бюджетден 238 миллион сом бёлюннгенди. Сагъынылгъан программагъа кёре, ырысхыла Нальчик шахаргъа, Урван эм Прохладна муниципал районлагъа жетдирилгендиле. Битеу да инсанланы оюла тургъан юйледен кёчюрюрге 2022-2023 жыллада Жер-жерлени айнытыу фондну юсю бла 330 миллион сом бёлюнюрюкдю. Дагъыда башда сагъынылгъан программагъа тийишлиликде инсанланы оюла тургъан юйледен 2022-2025 жыллада 60 кёп фатарлы юйде жашагъан 2540 инсан кёчюрюллюкдю.

Шёндю Къабарты-Малкъарны билим берген учрежденияларында тынгылы ремонт ишле бардырыладыла. Бюгюнлюкге онтёрт школда ишле битгендиле, декабрь айны аягъына алты мектепге - Бахсанда, Нальчикде, Терк эм Май районлада ремонт этилип бошаллыкъды.

Республиканы оноучусу 2023 жылда къауум элде спорт объектлени къурулушларын бардырыргъа проектлерин жарашдырыргъа кереклиси бла байламлы буюруу бергенди. Аллай тилеклени анга республикада жашагъанла приёмгъа келгенлеринде айтхандыла. «Белгиленнген планларыбызда ол ишлени эсепге алыргъа керекбиз» - деп чертгенди Казбек Коков. Аны юсюнден КъМР-ни Башчысыны бла Правительствосуну пресс-службасы билдиреди.

Бизни корр.