Борчлары болгъанла токсуз къалгъандыла

«Россети Шимал Кавказ» компанияны Къабарты-Малкъарда бёлюмюню специалистлери озгъан октябрьде бардыргъан рейд жумушларыны кезиуюнде 82 фатаргъа баргъан токну кесип кетгендиле. Аланы иелерини барыны да 2,2 миллион берликлери болуп, аны тёлемей тургъанлары ючюн.

Алай токсуз къаллыкъланы тизмесине уа 1334 фатар тюшген эди. Тийишли билдириу этилгенден сора 1252 абонент борчларын жабаргъа ашыкъгъандыла. Токлары алгъын кесилген, алай ала кеслери соргъан да этмей артха къошулгъан 49 абонент ачыкъланнганды. Аланы ишлерин сюзюп, материалланы правону къоруулаучу органлагъа жиберирге боллукъдула.

Компанияны адамла бла ишлеген бёлюмюню башчысы Спартак Кашежев айтханнга кёре, токлары кесилип кетген абонентле биринчиден борчларын жабарыкъдыла, ызы бла аланы артха сетьге къошханлары ючюн да тёлерикдиле. «Кеслери алларына къошулгъанланы уа административ жууапха тартырыкъдыла. Аны себепли абонентлерибизни барын да уллу кёллю болмазгъа, электрокюч ючюн заманында тёлерге чакъырабыз», - дегенди ол.

Токну кесерге оноу этилгенини юсюнден билдириуню абонентни къолуна тутдурадыла, почта бла неда СМС бла жибередиле. Къара чёпге тюшген хайырланыучуланы тизмеси www.kabbalkenergo.ru сайтда «Клиентам» деген бёлюмде да басмаланады.

Электрокючню багъасын компанияны офислеринде, «Свет Онлайн» приложенияда, аны сайтында «Личный кабинет» сервис бла неда «Сбербанк онлайн» система бла тёлерге боллукъду.