Жерлешлерине хайыр келтирирге не заманда да таукелди

Кёп сагъыш этмей

 Созайланы Салихни  къызы Нюржан, Хасанияда Фрийланы Рамазанны атын жюрютген  16-чы  номерли  мектепни  алтын майдалгъа бошап, Къабарты-Малкъар къырал университетни медицина факультетине киреди. Интернатураны уа республикалы сабий клиника больницаны неврология бёлюмюнде ётгенди. Ызы бла аны Россейни къырал медицина университетине, анга алгъын экинчи медицина институт да дегендиле, ординатурада окъургъа жибередиле. Аспирантурагъа да анда киргенди. Кандидат диссертациясын да анда  къоруулагъанды.

Гитчелигинден да медицина литературагъа эс бургъанды. Юйюрде тамата болгъаны себепли, Созайлада дагъыда эки къыз бла жаш ёсгендиле, алагъа да ол «аналыкъ» этгенди.

  Аны айтханым, юйде тиширыу жумушланы да тынгылы этерге эртте юйреннген эди. Аны бла бирге уа ата-анасы бахчагъа чыкъсала, алагъа болушургъа бек сюйгенди. Тигиу этерге да устады. Эсли бола, ёсе келгени бла уа анасыны жолу – медицинаны – сайлайды.

      Къармашыулукъ 

Университетни бошай туруп, специализацияны кезиую жетгенде, Нюржан педиатр болургъа  сюйгенди. Ординатурада болгъанында уа жаш аспирант, ишини юсю бла Москвада перинатальный арагъа терк-терк барып, жангы туугъан къагъанакълагъа, аланы халлерине къарап тургъанды. Хар затны да жик-жиги бла билирге, тутхан ишин тынгылы тамамларгъа итиннген жаш врачны эслемей къоймагъандыла. Аспирантурада окъуй тургъанлай аны кеслеринде ишлерге аладыла. Аны  кандидат диссертациясыны материаллары да практикалы ишинде жыйышдырылгъандыла. Артда аны энчи иели клиникалада ишлерге чакъыргъандыла. Аны бла бирге уа университетни тёртюнчю  курсуну студентлерине сабий неврологиядан лекцияла да окъуйду.

 -Ахшы врач – ол неди? Аллай ангылау жокъду. Врачла игиле боладыла, неда ала жокъдула. Ол, жаланда профессионал болуп къалмай, саусузну жууукъ адамыча болургъа керекди. Аны ышаныуу уа уллу магъананы тутады, алайды да, аны бла бирге ауруугъа къажау сюелирге керекди. Ма ол заманда  эсеп 2:1  бизни жанлы болур эмда биз аны хорларбыз. Сюе эсенг, анга тамаша де, алай, мен оюм этгенден, ол жашаудан алыннган шартды,- деучюдю Нюржан. Жашлыгъына да къарамай, ол заманындан алгъа туугъан кёп сабийни аягъы юсюне салгъанды.

Мындан бир ненча жыл алгъа уа москвачы жаш тиширыу бир жолгъа тёрт сабийни  кезиуюнден алгъа тапханды. Аланы ауурлукълары 600-800 граммла дан кёп тюйюл эди. Ала бирем-бирем къол аязгъа сыйынып къала эдиле. Сау къаллыкъдыла, жашарыкъдыла деп ышаннганла хазна жокъ эдиле. Нюржан, сабийлени къатындан кече-кюн да кетмей, алагъа  аналарындани эсе сакъ къарагъанды.

           Не халда да къажыкъмагъанды

Медицина илмуланы доктору, профессор Россейни баш сабий клиникасында неврология бёлюмню таматасы Андрей Петрухин Созайланы  къызны  лекцияларында кёргенде: «Сен кандидат диссертация жазмай амалынг жокъду, сени къолунгдан келликди»,-деп, Нюржаннга теманы бергенди. Аны аты былай эди: «Нейроблалогический, понтогенотический  подход в оценке  риска формирования двигательных нарушений у детей первого года жизни, перенёсших типоксию». «Сёзсюз, тема къыйынды, жууаплыды, алсанг, кече-кюн  демей,  ишлерге керексе»,- деп да къошады профессор.

Нюржан бу жол да къыйынлыкъдан къоркъмагъанды. Ол аспирантураны да бошап, кандидат диссертациясын да къоруулайды. Диссертациясын жаза, церебриальный  къурушуудан ауругъан сабийлени багъыуну методикасын жарашдырыугъа да  къыйынын къошханды.

Ара шахар игиди, алай специалистле юйде да керекдиле. Москваны клиникасында ишлеген махтаулуду, даражалыды,  болсада Нюржан анда къалыргъа демегенди. Ол республикагъа къайтып, мында туугъан къагъанакълагъа, аланы аналарына болушууну къолгъа алгъанды.  Бай билимин кесини бир жерлилерине саугъа эте, кюн сайын да Нальчикде поликлиникада  сабий невролог болуп ишлейди.