Коронавирусну юсюнден жангы шартла

13 ноября, 2022 - 12:00
Кёп болмай  Къабарты-Малкъар къырал университетни медицина бёлюмю вузну 90-жыллыгъына жоралап,  «Диализ Нальчик» медицина учрежденияда «Биз коронавирусну (COVID-19) юсюнден не билебиз?» деген аты бла  илму конференция бардыргъанды.  Анда университетни эм тыш къыраллы алимлени  ишлерине да  къаралгъанды.  
Анга медицина бёлюмню алты  кафедрасыны преподавательлери,  аспирантлары эм алтынчы курсуну  студентлери къатышхандыла. Ол санда диагностиканы, багъыуну эм  профилактиканы жангы амалларыны юслеринден билдиргендиле.     
Экспертле бла студентле микробиология, вирусология эм иммунология кафедраны таматасы профессор  Заира Хараеваны, неврология, психиатрия эм наркология кафедраны таматасы профессор Лариса Тлапшокованы докладларына бюсюрегендиле. Алада айтылгъаннга кёре, коронавирусдан ауругъанланы 10-30 проценти сау болгъанларындан сора да, иги кесек заманны  инфекцияны заранындан къыйналгъанлай турадыла.   
COVID-19 бла жюрек эм къан тамыр аурууланы   байламлыкъларыны юсюнден а   факультет терапия жаны бла кафедраны таматасы профессор   Мурат Уметов бла госпиталь терапия кафедраны таматасы профессор Рина Арамисова хапарлагъандыла. Ала, коронавирусдан къыйын  ауруп, госпитальгъа тюшген  жерлешлерибизни  арасында ауушханланы эсеплери бла шагъырейлендиргендиле.        
COVID-19 мультисистемалы ауруу болгъаны, ол бирде  саусузну битеу органларына къатылгъаны да  ачыкъланнганды. Анга къаллай анализле шагъатлыкъ этгенлерини юсюнден а  аспирант Даяна Гергова айтханды.  
Жамаутаны саулугъун сакълау эм профилактика  медицинаны  кафедрасыны келечилери уа   COVID-19 ауруудан  диспансеризация эм  вакцинация бардырыуну магъанасын ангылатхандыла.  
КъМКъУ-ну медиклери докладларында  коллегаларыны тинтиулеринден эм  кеслерини сынамлары бла алгъан  танг кесек шартны да  къошхандыла. Ол санда  медицина факультетни проектлерин да.   
– Биз клиника медицина жаны бла къыйын сорууланы  сюзер ючюн, быллай конференцияланы терк-терк бардырабыз. Бир айдан жукъгъан ауруулагъа аталгъан  форум ётдюрлюкбюз.  Анда  биягъы COVID-19 инфекцияны  юсюнден айтыргъа тюшерикди, нек дегенде аны хатасындан бизде аслам адам  ёлгенди, аланы кёбюсю  къыйын ауруулары болгъанла эдиле.   
Врачлагъа кюн сайын бу къужур  ауруу бла бетден-бетге тюберге тюшеди. Быллай жыйылыула уа  аланы билимлерин эм сынамларын да кючлерге болушадыла, – дегенди КъМКъУ-ну медицина факультетини  ич ауруула жаны бла кафедрасыны таматасы  Лилия Эльгарова.
 
 
 
Магометланы Сулейман хазырлагъанды.
  • 16 просмотров
Поделиться: