Аны жашау жоругъу: адам сёзюне ие болургъа керекди

Жанмырзаланы Сафар «ГОРЯНКА-А» предприятияны башчысыды. Урунуу жолун предприниматель болгъунчу дери иги да алгъа башлагъанды. Беш жылындан башлап, онюч жылына дери республиканы телевидениясында ишлегенди. Ол анда малкъар тилде бериуле бардыргъанды, тюрлю-тюрлю рубрикалагъа да къатышханды.
Юридический факультетни тауусхандан сора, правону къоруулагъан органлада, артда уа банкда да ишлеп тургъанды, алада иги сынам алгъанды. Бизнесге уа 2014 жылда келгенди.
Биринчи проекти – жеринден тепдирилмеген мюлкню Агентствосу болгъанды. Аны кезиуюнде ол банкла бла да байламлыкъла жюрютюп тургъанды. Сатыу-алыу юй ишлеп, аны да ортакъгъа берип башлагъанды. Ызы бла Пушкин атлы орамда бизнес-ара ачханды.
Долинскеде жюн базарны иеси алышыннганда, Сафар аны башчысы болады. Бу рынок шахарны бек ариу, туристлеге да сейирли жеринде орналады. Жашха ол бизнес да ма алай кёрюннгенди. Ол, эм биринчиден, республикагъа, миллетге да хайыр келтирирча. Къабарты-Малкъарны туризм сферасына эмда экономикасына къошумчулукъ этиу – ма ол болады Сафарны умуту.
Рынокну ол буруннгулу къалача аллай сейирли жер этерге сюеди. Не десенг да, аны тарыхы да эрттеден бери келеди.
Келир кезиуледе анда тюрлю-тюрлю жамауат тийреле, скверле къураргъа умут барды. Ызы бла уа «Усталаны ёзенин» жарашдырыргъа сюедиле. Къонакъла анда къолдан устала этген затлагъа къараргъа, ала кеслери да къалай ишлегенлерин кёрюрге, аладан абериге юйренирге боллукъдула.
Жанмырзаланы Сафарны иш кёллюлюгю, усталыгъы, жууаплылыгъы бла «ГОРЯНКА-А» жетишимле болдургъанды, рынокда тийишли жерин алгъанды. «Мени бизнесим» деген Арада ол тюрлю-тюрлю семинарлагъа, тренинглеге къатыша тургъанды, консультация болушлукъ да алгъанды. Аланы бизнесде толу хайырланады.
Ара къурагъан жандауурлукъ жумушлагъа Сафар тири къатышады. Аллай ахыргъы акцияланы юсюнден айтханда, сёз ючюн, быйыл май айда сабийлени къоруулауну кюнюне аталгъан жумушну, августда уа сабийлени школгъа хазырлауну эсге тюшюрюрге боллукъду.
Аны жашауунда баш жорукъ – адам кеси сёзлерине ие болургъа керекди.

Омарланы Мурат.
Поделиться: