Тазирден эркин этилгендиле

Быйыл 7 октябрьде чыгъарылгъан 378-ФЗ номерли федерал закон жашау журт бёлюмде законлагъа тюзетиуле кийиргенди. Сёз жашау журт-коммунал жумушла ючюн тёлеулени заманында этмеген инсанланы бир-бир къауумларына   тазир салыуну низамыны юсюнден барады. Документге тийишлиликде, мобилизация бла аскерге къуллукъ этерге чакъырылгъанла эмда аланы юйюрлери борчлары ючюн  салыннган тазирни тёлеуден эркин этилгендиле. Закон кючюне басламаннган кюнден – 7 октябрьден – киргенди.

«КъМР-де кёп къатлы юйлени тынгылы жангыртыу жаны бла регион оператор» фонддан бизге ангылатханларыча, мобилизация бла РФ-ни Сауутланнган кючлерине чакъырылгъан инсанла жашау журт  коммунал жумушла эмда кёп къатлы юйледе жашагъанла бирге хайырланнган мюлк ючюн ахчаны болжалында тёлемей, борч жыйылса,  тазир салынырыкъ тюйюлдю. Быллай себеплик аланы юйюрлерине да этиледи. Эсигизге салайыкъ, тёлеуле кетерилмейдиле, жаланда борчха тазир саналлыкъ тюйюлдю.

Энчи операциягъа къатышхан инсанлагъа «Къаугъаны ветераны» деген ат бериледи. Алай бла уа ала эмда юйюрлери  къырал льготагъа тийишли боладыла. «Ол санда  ала жашау журтну наемгъа алгъанда, тёлеулени жартысына компенсация бериледи. Дагъыда кёп къатлы юйде жашагъанла бирге хайырланнган мюлк эм тынгылы жангыртыу жумушла ючюн тёлеулени жартысы да артха къайтарыллыкъды», - деп билдиргендиле бизге фонддан.

Аны бла бирге 1995 жылда 12 январьда чыгъарылгъан 5-ФЗ номерли законда уа социал себеплик аскерчи борчларын къаллай болумлада толтургъанына, аны саулугъуна, жашаууна къоркъуулу кезиуле болгъанларына бла къалгъанларына кёре тергеледи.

Борчлары болгъанла тазирни кетертир ючюн, «КъМР-де кёп къатлы юйлени тынгылы жангыртыу жаны бла регион оператор» фондха келирге боллукъдула: Нальчик ш., Максим Горький атлы орам, 17 «а». Фонд эрттенликде 9 сагъатдан ингирде 18 сагъатха жери ишлейди (солуу кезиу - 13-14 сагъатда). Ыйых кюн фонд ишлемейди.

Соруулары болгъанла бу телефон номерлеге сёлеширге боллукъдула: 8 (800) 700-64-12 (къызыу ызны телефону). Неда 8 (8662) 42-40-23 (приёмный); 8 (8662) 42-56-26 (абонент бёлюм).

Бу жаны бла тилекни регион операторну официальный сайтында берирге да боллукъду https://kapremontkbr.ru/. Тилек бла бирге мобилизация бла аскерге чакъырылгъанына шагъатлыкъ этген документ да керек боллукъду.