Сууаплыкъ алгъандыла

Къабарты-Малкъар Республикада  сабийлени эмда жаш тёлюню социал-культура жаны бла айнытыугъа себеплик этген  регион жамауат организацияны  директору  Зита  Кабулова бу кюнледе бир къауум жаш адам бла  жандауурлукъ ишле этгендиле. Ала Нальчикде 1-чи номерли  культурология гимназия-интернатда бла «Намыс»  реабилитация арада тургъан сабийлеге акцияла къурагъандыла.  Зитаны биргесине  арада ишлеген бир къауум жаш адам, волонтёрла да  акъылбалыкъ болмагъанла тургъан тутмакъгъа, Вольный Ауулда къыяулу сабийле кечиннген интернатха саугъала элтип да  баргъандыла. Аллайла бла Нальчикде «Эдельвейс» клубда да тюбешгендиле, ала бла тюрлю-тюрлю оюнла да къурагъандыла.

Бир кюн а къыркъдан артыкъ сабийни искусстволаны музейине, Нальчикде  Владимир Вороков атлы  маданият фондну юйюне да  элтгендиле.  Ала анда Республиканы къыраллыгъыны 100-жыллыгъына  жарашдырылгъан  сурат кёрмючлеге  къараргъа онг тапхандыла. Алагъа музейде болгъан суратланы юслеринден тынгылы хапар айтхандыла, сорууларына жууапла бергендиле.

   Кёрмючге къарагъандан сора  сабийле кеслери да оюмларын айтхандыла. Жетижыллыкъ Василий Терехов: «Мен бу жол  ёмюрюмде  музейге биринчи кере келгенме. Мында аллай ариу суратла бардыла. Аланы хар бири да бек аламатды»,- дегенди.

Эгечле Тамара бла Ляна Хагажеевала уа артыкъ да бек тюрсюнлю  суратланы жаратхандыла. Къызчыкъла жашил, къызыл чибижини, гюллени суратларына сейир этип къарагъандыла. Володя Бековха  сегиз жыл болгъанды. Ол тауланы суратларын , кечегиде алыннган суратлагъа да сюйюп къарагъанын  айтханды.

Сабийле, маданият фонддан кетип бара, анда ишлегенлеге  бюсюрегенлерин билдиргендиле. Экспонатланы да жаратханларын, ары, музейге да  дагъыда келирге сюйгенлерин билдиргендиле.