Ыннаны алдап, 765 мингин алгъандыла

КъМР-де МВД-ны хыйлачыланы ётюрюклерине алданмазгъа, сакъ болургъа чакъырады. 

Озгъан ыйыкъда РФ-ни Ич ишле министерствосуну Нальчик шахарда управлениясына 81-жыллыкъ ынна тарыгъыу къагъыт бла келгенди. Анда айтылгъаннга кёре, ким эсе да бир адам сёлешип, ич ишле органладан къуллукъчума деп, аны къызы жолда аварияда терс болгъанын айтханды. Салгъан къоранчны къайтарыргъа тюшерикди дегенди. Сёлешгеннге ийнанып, амма, чыгъарып, 765 000 сом юйюню къатына келген курьерге бергенди.

Аманлыкъчыны юсю бла законодательствогъа кёре 159-чу статья бла (Мошенничество, совершенное в крупном размере) уголовный иш ачылгъанды. Бусагъатда полициячыла аманлыкъчыны ким болгъанын эм къайдагъысын тохташдыра турадыла, деп билдиредиле МВД-ны КъМР-де пресс-службасындан.

Багъалы жерлешлерибиз!

Сизге алай сёлешселе, бек алгъа къайгъы этмезге кюрешигиз. Не тюрлю сылтау къурап, телефонну салыгъыз. Сора, анда сёз кимни юсюнден баргъан эсе да, аны кесине сёлешип, не болгъанын соругъуз. Ишни болушун билгенлей, мычымай, полициячылагъа сизге сёлешип алдар умут этгенлерин  айтыгъыз, деп юйретедиле право низамны сакълаучула.

 

Хуламханланы Алина.
Поделиться: