Къаршчы спортчулагъа бир балл окъуна бермегенди

Спортну халкъла аралы устасы Кокаланы Асланны хурметине аталып, Черкесскде каратеден уллу битеукъырал эришиу болгъанды. Анга Россейни 10 регионундан, ол санда Шимал Кавказны республикаларындан, Краснодар крайдан, Кърымдан, Юградан бла талай шахардан 8-17-жыллыкъ жаш эм абадан 470 спортчу къатышхандыла.

Жетишимлери бла республикадан Элбрус районну олимпиада резервли спорт школуну келечилери къууандыргъандыла. 16-17-жыллыкъланы араларында Керим Алихаджиевден кючлю чыкъмагъанды. Ол, 61 килограммгъа дери ауурлукъда сермеше, къаршчы сюелген битеу спортчуланы бир баллны да бермегенлей хорлагъанды. Ахырында уа 7:0 эсеп бла алгъа чыкъгъанды, алай бла «алтынны» алгъанды.

 Бу жыл санда 76 килограммгъа дери ауурлукъда экинчи жерде Къурманланы Коншау-Бий орналгъанды. Аллай эсеп бла абадан спортчуланы араларында эришген Андрей Вихрь (75кг.) къайтханды. Аны краснодарчы спортчу - Россейни чемпиону бла сермеши, тенг халда ётюп, 1:1 эсеп бла бошалгъанды, алай хорлам, тёреде бола келгенича, биринчи очкону алгъаннга берилгенди.

Суратда: биринчи жерде Керим Алихаджиев.