Предпринимательлени эркинликлерин сакълау энчи контрольдады

КъМР-ни Парламентини президиумуну кезиулю жыйылыуунда «комитетни сагъатыны» чеклеринде предприниматель сферада уголовный ишлени тинтгенде законлукъ къалай жалчытылыннганы сюзюлгенди. 

 Аны юсюнден КъМР-ни прокуратурасыны ич ишле органланы уголовно-процессуал жумушларына, наркоконтроль эм сюд приставланы ишлерине надзор жаны бла бёлюмюню башчысыны орунбасары Заур Нагацуков доклад этгенди. Ол ачыкълагъан шартлагъа кёре, 2018 жылда тюрлю-тюрлю аманлыкъла этгенлери ючюн жууапха 90 бизнесмен тартылгъанды, быйылны 1-чи кварталында уа – 17.

Прокуратура УПК сакъланырына, терслеу шартла тюзлюк бла жыйылырларына, толу болурларына энчи эс бурады. Болсада предпринимательство жаны бла законлагъа бузукълукъла этгенлени саны ёсгенлей барады. 

Докладчы терс шартлагъа кёре ачылгъан процессуал жумушланы заманында ачыкъларгъа, аланы тохтатыргъа къолдан келгенин белгилегенди. Былтыр  надзор орган тамамлагъан жумушланы хайырындан аланы саны 45,6 процентге азайтылгъанды. 2018 жылда эки предприниматель уголовный жууапха бегиусюз тартылгъанлары ючюн реабилитация алыргъа эркин этилгендиле. 

Полициячыла былтыр ауур аманлыкъ этгени бла байламлы излеуде болгъан бизнесменни тутхандыла. 

Докладда ишеклини следствие баргъан кезиуде юйде неда изоляторда тутууну юсюнден оноуну чыгъаргъанда даулашлы шартланы юслеринден да айтылгъанды. Нагацуков ангылатханыча, РФ-ни Граждан кодексини 2-чи статьясына тийишлиликде, предприниматель иш бла кюрешгенле къырал эсепге турургъа борчлудула. 

Предпринимательлени эркинликлерин жалчытыу жаны бла соруула право низамны сакълаучу органланы координация кенгешлеринде, прокуратураны коллегияларында, ведомствола аралы ишчи къауумну жыйылыуларында дайым да сюзюледиле. Алада уа бу сферада законлукъну жалчытыу жаны бла тийишли эсгертиуле чыгъарыладыла эмда аланы тамамларгъа жууаплыла белгиленедиле, деп чертгенди докладчы.

Нагацуков айтханыча, терс  шартлагъа кёре жууапха тартыу кезиулени болдурмаз ючюн прокуратура контрольну къатыландыргъанды, ол санда  следствияны болжаллары сакъланырларына энчи эс бурулады. 

Жыйылыу жууаплы органлагъа эсгертиуле къабыл кёрюу бла бошалгъанды.