Эсепге алынмай ишлегенлени санын азайтыу бла байламлы сорууланы сюзгендиле

КъМР-ни Башчысы Казбек Коков Шимал Кавказда эсепге алынмай ишлегенлени санын азайтыу эм урунуу халланы законнга тийишли жарашдырып ишлерча этиу бла байламлы ведомствола аралы комиссияны ишине къатышханды. Жыйылыу  Россей Федерацияны Президентини Шимал-Кавказ федерал округда толу эркинликли келечиси Юрий Чайканы башчылыгъы бла бардырылгъанды.

Кенгешни ача, Юрий Чайка Шимал Кавказда эсепге алынмай ишлегенлени санын азайтыуну эм урунуу халланы законнга тийишли жарашдырып ишлерча этиу соруула артыкъда бек магъаналы болгъанларын чертгенди. Бу проблемагъа комплексли къараргъа эм чыгъа тургъан сорууланы системалы тамамларгъа керек болгъанын энчи белгилеп айтханды полпред.

Регионланы башчылары шёндю алада болгъан болумну юсюнден докладла этгендиле. Ол билдириулеге кёре, кеслери алларына иш къурап уруннганланы саны жылны башындан бери 2,9 кереге ёсгенди. «Бу проблеманы тамамлау бла байламлы къыйматлы ишлеу тийишли даражада бардырылса, болум игилениригине сёз да жокъду», - деп чертгенди Юрий Чайка. Президентни толу эркинликли келечиси белгилегеннге кёре, сагъынылгъан комиссия  бек алгъа адамланы социал эм урунуу эркинликлерин къорууларгъа керекди. Жыйылыуну итогларына кёре ол жаны бла тийишли буйрукъла да жарашдырылгъандыла.

 Видеоконференция амал бла жыйылыугъа РФ-ни Урунуу эм социал жаны бла къоруулау министрини орунбасары Елена Мухтиярова, РФ-ни Генеральный прокуроруну орунбасары Андрей Кикоть, Федерал налог службаны Шимал Кавказда ведомствола аралы инспекциясыны таматасы Владимир Радченко, округну регионларыны башчылары,  федерал министерстволаны эм ведомстволаны жер-жерли управленияларыны эм жамауат биригиулени келечилери къатышхандыла, деп билдиредиле КъМР-ни Башчысыны бла Правительствосуну пресс-службасындан.

Бизни корр.