Хыйлачыла энтта да тирилгендиле

Роспотребнадзорну Къабарты-Малкъарда Управлениясында адамлагъа аланы атларындан хыйлачыла сёлеширге боллукъларын энтта да къайтарып билдиредиле, сакъ болургъа чакъырадыла. Анда айтханларына кёре, белгисиз адамла кеслерин, ведомствону таматасыча кёргюзтюп, организациялагъа сёлешип, банкда счётха ахча кёчюрюгюз неда аны энчи аскер операциягъа къатышханлагъа къолдан-къолгъа беригиз дейдиле.

Быллай хыйлачылыкъ этгенле, жаланда ахча къоллу болуп къалмай, Россей Федерацияны къырал органларыны эмда организацияларыны даражаларын тюшюредиле, дейдиле Роспотребнадзорда. Ол хапарланы юсюнден мычымай ведомствону Управлениясына (42-24-77, 42-35-74) эмда право низамны сакълаучу органлагъа сёлешип билдиригиз, - деп да тилейдиле.