Нёгерине дерт тутханды

Быйыл 3 августда юч эр киши Прохладныйде аракъы иче болгъандыла. «Байрамны» кезиуюнде аладан экиси даулашып башлагъандыла. Аладан бирини  бу болум жюрегине бек тийгенди. Ол нёгери  жууап бермез чекге дери эсиририн сакълап, аякълары, къоллары бла тюйгенди. Алайда саулугъуна салыннган ауур зарандан эр киши бир ненча сагъатдан ауушханды. Ёлюкню тапханда, мурдарлыкъны букъдурур мурат бла терсленнген аны басдырыргъа акъыл этеди. Ингир жетгенлей, ол нёгерини ёлюгюн арбагъа салып, адам да жюрюмеген жерге элтгенди эм анда асырагъанды. Юйюне къайтып, аманлыкъны ызларын жокъ этерге кюрешгенди.

РФ-ни СК-сыны Прохладна районда следствие бёлюмюню къуллукъчулары бу шартла бла байламлы Россейни УК-сыны 111-чи статьясыны 4-чю кесегине эмда 316-чы статьясыны 2-чи кесегине кёре терслеу материалла жарашдыргъандыла. Ол билип, адамны сулугъуна ауур заран салгъаны, аны хатасындан аны ёлтюргени эмда ауур аманлыкъны букъдургъаны ючюн жууапха тартыллыкъды.

Следовательле уголовный ишни тинтип бошагъандыла эмда аны сюдню къараууна бергендиле, деп билдиргендиле бизге ведомстводан.