Батарейле иги жылынмай эселе

Кюз келип, хауа да сууукъдан сууукъ болуп башлагъаны бла коммунал предприятияла юйлеге жылыу берип тебирерге керекдиле. Алай бир-бир фатарла уа артыкъ иги жылынмай турургъа боллукъдула. Аны юсюнден къайгъырыргъа керекмиди, керек эсе уа, къайры барып тарыгъыргъа боллукъду – анга КъМР-ни Тарифле эмда жашау журтлагъа надзор этиу жаны бла къырал комитетинде жууап бергендиле.

Иш алай болса, эм биринчиден, фатарны иеси жылытыу жаны бла нормативле бла шагъырейленирге керекди. Ала РФ-ни 2011 жылда 6 майдан 354 номерли бегими бла тохташдырылгъандыла. Анга кёре, адамла тургъан отоулада хауаны жылыулугъу 18 градусдан, фатарны мюйюшюнде отоулада уа – 20 градусдан энишге тюшерге жарамайды. Анга жылыу бла жалчытхан структура жууаплыды: управляющий организация, ТСЖ, ЖСК, жылыу жиберген организация болсун - башхасы жокъду.

Алай дагъыда отоулада сууукъ болгъанын сезсегиз, неда хауаны жылыулугъу сагъынылгъан нормативлеге келишмегенин кёрсегиз, юйню жумушларына къарагъан организацияны диспетчер службасына сёлешигиз. Хауаны жылыулугъун отоуланы эм уллусунда, батарейледен эм азындан жарым метр бир жанына туруп алай ёнчелейдиле. Тинтиу этилгенден сора тийишли акт жарашдырылады.

Фатарда сууукълукъну сылтаулары бир ненчадыла. Терезеле бла эшикле тышындан сууукъ хауаны жибере эсе неда батарейлени ичлери эрттеден да тазаланмай туруп, жылыу тап айланмай эсе – бу кемчиликлени кетериу бла юйню иеси кеси кюреширикди. Алай радиаторлагъа къайнар суу келмегенини, кёп фатарлы юйде быргъыла тапсыз болгъаныны эмда башха (тыш) сылтауланы хатасындан жылынмай тургъаны тохташдырылса уа,  ишни организация этерикди. Ол аны борчуду!

Дагъыда бир эсгертиу: кече (сагъат онекиден башлап, эрттен алада сагъат бешге дери) отоулада хауа эм уллусу – нормативден юч градусха азайыргъа боллукъду. Ол бузукълукъгъа саналмайды. Къалгъан заманда уа не азгъа да тюшюу жарамайды.

 

Улбашланы Мурат хазырлагъанды.
Поделиться: