Продукцияны ууландыргъан затладан сакъларча

Быйылгъы кюз эл мюлкде уруннганланы жылы, чууакъ кюнле бла къууандыргъанды. Алай дагъыда аграрчыла игирек къармашып, сабанладан мирзеуню ташып бошаргъа керекдиле. Нек дегенде, жауунла башлансала, ол мылы болуп, ызы бла мугут этип неда чирип башларгъа боллукъду. Ветеринар эмда фитосанитар надзор этиу жаны бла службаны специалистлери ангылатханларына кёре, аланы къозгъагъан затла уа кёз кёрмезча аллай гитче жууаладыла. Ала жайгъан микотоксинле тирликни ууландырып, жукъгъа жарамазча этерге боллукъдула. Бютюн кенг жайылгъан микроорганизмлени санында баш жерни мугутну къозгъагъан жууала аладыла. Аланы бир ненча минг тюрлюсю барды. Бары да угъай, алай бир-бирлери уа сагъынылгъан токсинлени чыгъарадыла.

Микотоксинле мирзеуню, къудоруну, чёплеуню, тахта кёгетлени эмда жемишлени бузгъан затладыла. Ала асламысында быллай продукция тапсыз жыйылса неда тийишлисича сакъланмаса чыгъадыла. Бу ууландыргъан затла иссиликге бек чыдайдыла. Башхача айтханда, аш этгенде да къурумайдыла.

Бир ненча жюз тюрлюлерини арасында адамны эмда малланы саулукъларына бек къоркъуулугъа афлатоксинле, А охратоксинле, патулин, фумонизинле, зеараленон эм ниваленол/дезоксиниваленол саналадыла. Аны себепли эл мюлк товарла чыгъарыучула эмда предпринимательле бу затлагъа эс бурургъа керекдиле.