Сабийлеге – татымлы алмала

Педагогика урунууну ветераны, чыгъармачылыкъ жаны бла да  хунерли,   «Надежда России» деген тиширыуланы битеуроссей  организацияларыны бёлюмюню таматасы  Фатима Абазехова кесини дачасында болмагъанча аламат терек бахча ёсдюргенди. Ол бай тирлигин  бирсилеге да  юлеширге излегени уа энчи махтаулукъгъа тийишлиди.  

- Мен жайны узуну алма тереклериме тынгылы къараргъа кюрешгенме. Керексиз бутукълары бла чырпыларын кетергенме, дарманларын эм семиртгичлерин да салыр ючюн къоймагъанма. Ол себепден жемишле  качестволу болгъандыла. Юйюрюме эм танышларыма да  алма жетерчады.   Аны ючюн жерлешлерими сыйларгъа да унутмайма.  Бизни биригиу не заманда да  сабийле жашагъан  учреждениялагъа  тири болушды. Бу жол да тирлигими  бир кесегин алагъа юлериширге сюеме , - деп къошханды  Фатима Абазехова.

Аны  башламчылыгъыгъына тиширыуланы «Надежда России» биригиуюню, Нальчикде коммунистлени къаууму  эм башхала да къошулгъандыла.

Социал сетьледе эшитип келгенле да танг кесек бардыла. Ол санда КъМКъГТ-ка колледжни ючюнчю курсуну окъуучусу Мурат Мизов  алма жыяргъа  болушады.    Афган урушну ветераны, Чегем районда ич ишлени диспетчер службасыны  болушлукъчусу Барасби Карданов а  ГАЗ-ель машинасы бла ташыргъа  жетгенди. Андан сора да, кёп сабийли эки ана  эм башхалада да къолларындан келгенча   болушадыла.

 - Акцияны чеклеринде челек бла жарым сыйыннган пакетледен жюзюсю жыйылгъанды.   Сабийлени татымлы аламла бла сыйларгъа онг табылгъаны   бек къууандырады. Кёп болмай ыразылыкъларын айтып Юйюрге бла сабийге социал болушлукъ бериу арадан, Нартанны школ-интернатындан эм  «Намыс» сабий юйюнден  да сёлешгендиле. Жандауурлугъубузну чеклеринде Херсондан келген гитчелеге да 15 пакет алма берилгенди. Ала да бизни жемишлерибизни бек жаратып ашагъандыла, - дейди Фатима Абазехова.