Энди дарманланы интернетде сатып алыргъа боллукъду

Бу кюнледе РФ-ни Президенти бир-бир законлагъа къол салып, ала кючлерине киргендиле. Документлени арасында – мобилизациягъа тюшгенлеге къырал себеплик, дарманланы интернетде сатыу эм башхала бардыла.

Жаланджа врач жаздыргъанла

Рецепт бла берилирге керекли дарманланы интернетде сатып алыргъа эркин этилгенди. Ал кезиуде сынау халда бу проект бир-бир регионлада ишлерикди, ол хайырлылыгъын кёргюзтсе, битеу къыралда да сингдирилликди.

Алай  онлайн халда психотроп, спирти болгъан (25 процентден аслам) дарманланы сатаргъа жарарыкъ тюйюлдю. Дагъыда энчи болумда асыраргъа, сууукъ жерде тутаргъа керек болгъан дарманланы да интернетде сатаргъа эркин этилмейди.

Мобилизациягъа тюшгенлеге-энчи онгла

Энчи  аскер операциягъа мобилизация бла чакъырылгъанланы урунуу эркинликлери жаны бла закон да къабыл кёрюлгенди.  Энчи предпринимательча эсепде тургъан, неда организацияны иеси мобилизация бла аскерге чакъырылса, анга предприятиясыны ишин андан ары жалчытыу бла байламлы жумушланы тамамларгъа беш кюн берилликди.

Миллет маданият  хазнаны тизмеси къураллыкъды

Россейни халкъларыны  тёрелери, адетлери къыралны  миллет маданиятыны  хазнасына, байлыгъына саналадыла. Законнга кёре уа, аланы тинтиу эм сакълау, башхалагъа баям этиу жаны бла тизме къураллыкъды.  Ары уа  халкъ чыгъармачылыкъ, адет-тёреле да киредиле: орус тилде эмда къыралда жашагъан халкъланы тиллеринде.