Урунууну къыйматлылыгъын кётюрюуню амалларын сюзгендиле

Бу кюнледе Сочи шахарда «Производительность 360» деген тёртюнчю федерал форум бардырылгъанды. Ол урунууну къыйматлылыгъын кётюрюу эмда аяулу производство бла кюрешиу сфералада сынам бла шагъырейлендириу умутда къуралгъан эди, деп билдиргендиле КъМР-ни Экономиканы айнытыу министерствосундан.
Форумгъа бизни республиканы атындан сагъынылгъан министерствону башчысыны орунбасары Ольга Белецкая, «КъМР-ни Гарантияла фонду» НКО-ну башчысы Аскер Тхабисимов эм аны орунбасары Дина Нахушева къатышхандыла.
«Производительность труда» миллет проектге къошулгъан предприятияланы келечилери, аланы уа анда 70-ден артыкъ специалисти бар эди, ол проектни хайырыны, къаллай онгла бергенини юсюнден хапарлагъандыла, сынамларын да туура этгендиле.
Бу жыйылыугъа къатышханлагъа РФ-ни Президенти Владимир Путин алгъышлау письмосун жибергенди. Анда ол санда былай айтылады: «Чертирге сюеме: урунууну къыйматлылыгъын кётюрюу саулай экономиканы, предприятияланы да айнытыуда энчи жерни алады. Бюгюн биз промышленностьну, эл мюлкню, социал бёлюмню ишлерин тирилтирге, дагъыда импортну алышыу бла байламлы борчланы тындырыргъа, уста кадрла хазырларгъа, ахчасы иги тёленнген жангы ишчи жерле къураргъа керекбиз».
Республиканы келечилери форумда Самара областьны Компетенцияла арасыны башчысы Константин Серов бла тюбешгендиле. Эсге сала айтсакъ, КъМР-ни Гарантияла фонду ол Ара бла быйыл келишим этген эди. Аны чеклеринде самарачыланы болушлугъу бла «Кровля-Сервис» предприятие ол миллет проектге киргенди.
Дагъыда «Урунууну къыйматлылыгъын кётюрюр ючюн адрес халда билеклик этиу» деген регион проектни чеклеринде КъМР-ни Экономиканы айнытыу министерствосу, «Нальчик-сладость» эм «Севкаврентген-Д» предприятияла бла байламлыкъда ишлерге келишгенди.
Компетенцияланы федерал арасыны специалистлери ол предприятиялада производстволарын игилендириу, ишлеринде жартылыкъланы кетериу бла кюрешедиле, адамларын да юйретедиле. Аяулу производство бла кюреширге кёллендирир хыйсап бла, республиканы Бизнес-инкубаторуну мурдорунда «Фабрика процессов» къурала турады. Анда битеу керекли оборудование эмда техника бла жалчытыннган юйретиу-производстволу бёлюм ачыллыкъды. Дерслени уа билимли специалистле бардырлыкъдыла.

 

Улбашланы Мурат хазырлагъанды.
Поделиться: