Маршрутха тарыкъгъанланы саны ёсгенди

Арт кезиуде нальчикчиле бла акъсуучула 13 маршрутну осал жюрюую бла артыкъ ыразы болмагъанларын кезиулю кере социальный сетьледе билдиргендиле. Кертиси бла да, ол жалгъан дау болмагъанын мен кеси башымдан кюн сайын сынайма.

Бу маршрут къачан да осал жюрюйдю. Шахар администрациягъа къагъыт жазыула бла тарыгъыула бюгюнлюкге дери артыкъ хайыр бермейдиле. Мени кесиме ишге, сабийи школгъа элтгенде да аны бла жюрюрге тюшгени себепли, халны турушунлай билеме. «Маршруткагъа» минерге эрттен эм ингир онг болмагъанына барыбыз да юйреннген эдик. Алай энди  анга не тюш заманда неда анда сора да минер онг болмай къалгъан. Сёз ючюн, озгъан ыйыкъда тюш кезиуде жумушла бла бу маршрут жюрюген жерге барыргъа тюшгенди. Жарым сагъатха барып къайтырыкъ ишге сагъатдан аслам заман къоратханма. Сылтауу уа - 13 маршрутха минер онг болмагъаны.

Маршрут бла акъсуучуланы кеслеринден сора да Нальчикни курортларында солургъа келгенле да хайырланадыла. Жарсыугъа, кеси адамларыбызны араларында туристлеге ыразы болмагъанла да тюбейдиле. Ол а,сёзсюз, курортну, республиканы да сыйларын тюшюрген кезиудю. Аллай къаугъаны сылтауу уа транспортну тийишлисича жюрюмегени. Шахар ичинде ары олтурургъа сюйгенлени уа аллай онглары болмай къалады. Сора ингирде сабийни школдан алгъандан сора да маршрутда сюелир жер окъуна болмайды.Сюелгенлери саны бек аздан 6-8 адам чакълы болады. Битеу бу жарсыула уа рейслени аралары 20 минутдан асламгъа созулгъаны бла байламлыды.

Болумну юсюнден мен «ЦУР БР Official» Телеграм-каналгъа жазып, бу жарсыуну кетериуде себеплик этерлерин тилегенме. Аланы жууаплары бла сизни да шагъырей этерге сюеме: «Кюн ашхы болсун! Кертиси бла да, 13 маршут бла байламлы арт кезиуде жарсыула кёпдюле. Тинтиу рейдле ачыкълагъаннга кёре, айылгъан затла бошдан тюйюлдюле. Маршрутну ишинде бегиленнген жорукълагъа бузукълукъла этиуле табылгъандыла. Бюгюнюкде 20 транспортну орунуна 14-15-си барды. Сёзсюз, ол шарт маршрутну тап ишлеуюне чырмаулукъ этеди.

Битеу башда айтылгъан затланы эсге ала, бу маршрутну водительле къауумуну таматасы Нальчик шахарны администрациясына чакъырылгъанды. Тюбешиуде маршрут ызда эрттен, ингир эм адам аслам жюрюген кезиуде дежурныйлени тохташдырыу бла болумну тюзетиуню юсюнден барлыкъды.

2018 жылда маршрутха автобусла салыргъа деген оюм бар эди. Алай конкурс барырылгъанда анга къатышыргъа сюйген чыкъмагъанды».

Тюбешиу къалай ётгенини эм анда не оноугъа келгенлери бла сизни да шагъырей этерикбиз.