Нартюхден бай тирлик къууандырады

Бюгюнлюкде Къабарты-Малкъарны биригиулеринде къыстау мирзеулюк  нартюхню оруп кюрешедиле. Белгилисича,  республикада ёсген мирзеулюк битимлени арасында ол энчи жер алады эм тирликни да асламысы анга жетеди,- деп билдириледи КъМР-ни Эл мюлк министерствосуну пресс-службасындан.

Быйыл биринчи октябрьге чыгъарылгъан  эсеплеге кёре, регионну мюлклерини барында да нартюхден 621,8 минг тонна жыйылгъанды. Ол былтыр бу заман бла тенглешдиргенде 9,2 процентге кёпдю.

Арендаторла жыл сайын тирликге къошулурча дайым мадар этгенлей тургъанларын да белгилерчады. Сёз ючюн, быйыл  бир гектардан 75,1 центнер алыннгынды, неда буруннгу жылдан эсе 5,7 процентге артыкъ. 

Саулай алып айтханда, быйыл нартюх 137,8 минг гектарда салыннганды, ол  кёп къалмай, былтыргъы кёрюмдюге  келишеди. Бусагъатда мюлклени барында да нартюх 60 процент жерде  кетерилгенди. Кюнле бузулгъунчу аграрчыла ишлени къысха заманда тамамлар муратлыдыла.