Ток ючюн тёлемегенле жууапха тартыллыкъдыла

Кёп болмай «Россети Северный Кавказ» - «Каббалкэнерго» компанияны  Нальчикде бёлюмюню келечилери ток ючюн аслам заманны тёлемей тургъанланы жокълагъандыла. Быйыл сентябрьге чыгъарылгъан эсеплеге кёре, ток ыздан кесерча 687 заявка берилгенди.  Аладан 643 абонент токсуз къалмаз ючюн борчларын жабаргъа ашыкъгъандыла. Болсада 44 юйню энергокючден кесерге тюшгенди.

Энергетикле  эркинликсиз кеслери алларына ток ызлагъа къошулгъан борчлуланы да ачыкъларча рейд бардыргъандыла.  Аны чеклеринде 151 адресде болгъандыла эм  70 фатарда бузукълукъ этилгени билиннгенди.  Ала бла байламлы материалла ич ишлени келечилерине берилгендиле. Эркинликсиз, ол санда эсеплеген приборсуз токну хайырланнганла (урлагъанла) административ эм уголовный жууапха тартыладыла. Анга кёре, энчи иелиле 10-15 эм организайияла уа 100-200 минг сом тазир тёлерге тюшерикдиле.

Эсге сала айтсакъ, эки айдан аслам тёлемеген абонент  ток ыздан кесилирге боллукъду.  Аллай адам  ток бла жалчытылыныр ючюн борчун толсунлай жабаргъа тюшерикди. Ол санда ток чыбыкъны кесгенлерине эм къошханларына да кеси тёлерикди. Аны ёлчеми  объектни къыйынлыгъына кёре  болады. Сёз ючюн,  энчи арбазны иеси 3 минг, организацияны таматасы уа  10 минг сом берликди. Уголовный жууапха тартылгъанла уа РФ-ни Уголовный кодексини 165 -чи статьясына тийишлиликде эки жылгъа тутулургъа боллукъдула. 

Токдан чеклендирирге къоркъуу чыкъгъанын  хайырланыучула электрон почталарында,  компанияны сайтында «Коммунал жумушладан чеклендириу реестр»  бёлюмню «Клиентлеге» деген кесегинде неда СМС бла жиберилген билдириулеринде окъургъа боллукъдула.  Тёлеулени биригиуню офислеринде тамамларгъа онг барды. Юйлеринден чыгъалмагъанла неда заманларын къоратыргъа сюймегенле ол санда  башха жерледе тургъанла «Энчи кабинет», «Свет Онлайн» эм «СбарОнлайн»  мобиль приложенияланы хайырланыргъа боллукъдуа. Бир тюрлю сылтау бла толусунлай борчун жабалмагъан  реструктуризация этилирча  келишим къураргъа онгу барды. 

Хайырланылгъан ток ючюн заманында этилген тёлеулени хайыры бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадар этиледи.