Жашауун спорт бла байларгъа сюеди

Айдар 2013 жылда Кючмезланы Азрет бла Холамханланы Тахирни къызы Зухраны юйюрлеринде туугъанды. Бусагъатда Нальчикни 8-чи номерли школунда окъуйду, къатыш единоборствола (ММА) бла алты жылындан Жантуудуланы Азаматда кюрешеди. Спортну бу тюрлюсюн Айдар бошдан сайламагъанды – эки жылдан алты жылгъа дери аны атасы къоркъакъ болмасын деп кеси билгенине юйретген эди. Алты жылында уа Жантуудуланы Азаматха «Эльбрус» спорт клубха тренерликге бергенди.

Бир жылдан артыкъ заман озгъандан сора уа, Ростов шахарда фрифайтерден (эркин тутушуу) Россейни чемпионатында ол биринчи жерни алгъанды. Анда хорлагъанла дунияны чемпионатына къатышыргъа эркин эдиле, алай жарсыугъа ары баралмагъан эди.

Айдар алыкъа биринчи бла экинчи жерден энишге тюшмегенди. Жетишимлери да жыл санына кёре къууандырадыла. Алай 2021 жылда апрельде Кисловодск шахарда «ММА – Эркин тутушуу» деген СКФО-ну чемпионаты бла биринчилигинде алгъа экинчи жерни алгъанды. Бир кесекден а, июнь айда ётген финалында, биринчи жерге тийишли болгъанды.

Дагъыда 2021 жылда бардырылгъан зендокай ММА каратэден КъМР-де биринчилиги бла чемпионатында, андан сора да, ол жыл ётген зендокай каратеден СКФО бла ЮФО-ну фестивальларында биринчи жерлеге тийишли болгъанды.

2022 жылда болгъан жетишимлери да къууандырадыла. Алай ММА-дан къатыш аскер единоборстволадан 27 килограмм ауурлугъу бла алчыланы санына киргенди. Июньда да зендокай будо каратэден матчлы тюбешиуде хорлагъанды.

Спорт жашны окъуууна чырмау этмейди, ол аны бла жашауун байларгъа сюеди.