Ол затланы билгенни хатасы жокъду

Дарий къумачдан эски жау тамгъаны кетерир ючюн нашатырный спиртден жарым къашыкъны, глицеринден бла суудан да бирер къашыкъны къатышдырып, тамгъалы жерни анны ичинде 5-10 минут тутаргъа керекди.                                                                                      

                                                                *  *  *

Ичинде аш этилген табаны алгъа акъ къагъыт бла сюртюп, сора бек ууакъ тюйюлмеген туз бла ышып тазалайдыла.                                                    

                                                                  *  *  *

Алюминийден этилген адыр къаралгъан эсе, аны жангыдан агъартыр ючюн, къумач кесекни сирке суу къошулгъан суда жибитип, аны бла сюртедиле. Андан сора суу бла жууадыла.

                                                                *  *  *

Мясорубканы печь башында неда башха исси жерде къургъакъсытыргъа жарамайды: алай этилсе, ол терк къаралады, бичагъы да гумух болады.

                                                               *  *  *

Хрустальдан этилген сауутну жуугъандан сора картоф уннга бир кесек кёпдюреуюз къошуп, аны бла сыйпаса, адыр иги жылтырарыкъды.

                                                                   *  *  *                                                                    

Мияла сауут иги жылтырар ючюн аны жуугъандан сора алгъа сирке суу неда туз къошулгъан суу бла, аны ызындан а таза суу бла чайкъайдыла.

Сютню юсюнден

Къызыу кюн сютню ачытмай сакълар ючюн, ол тургъан мияла адырны суукъ суу болгъан башха адыргъа салып, аны башын жабып тургъан салфетканы къыйырын суугъа батдырып къояргъа керекди. Алай бла тохтамай суу къуруп, сютню температурасын бир халда тутарыкъды, не къызыу кюнде да сют ачырыкъ тюйюлдю.                                                         

                                                              *  *  *

Сют тёгюлмез ючюн ол къайнагъан кастрюльну ичине жау жагъаргъа керекди.

                                                             *  *  *

Къайната туруп сют ачымаз ючюн 1 литр сютге къашыкъ жарымы балтуз къошуп къайнатыргъа керекди. Суутхан а башы ачыкъ адырда этедиле.        

                                                            *  *  *

 Творог асыры кюшлю болса, аны тап халгъа келтирир ючюн аз-маз аш-азыкъ сода къошаргъа керекди.

                                                            *  *  *

  Бир-бирледе сют баш тап къатышдырылмайды. Алай болса, анга жумуртханы агъын къошуп, холодильникде суутуп, жангыдан къатышдырыргъа керекди.