Жаш предпринимательлени онгдурур амалланы сюзгендиле

«Иш кёллю Россей» жамауат организацияны Къабарты-Малкъарда бёлюмюнде видеоконференция халда жыйылыу бардырылгъанды. Анда жаш тёлю предпринимательствону айнытыуну эмда анга себеплик этиуню юсюнден сёлешгендиле. Анга бёлюмню башчысы Юлия Пархоменко эмда келечилери Бетал Ивазов бла Юлия Зотова къатышхандыла.

Ала организацияны жаш тёлю бла ишлеген бёлюмюн айнытыуну, аллай адамланы да чакъырып, быйылны ахырына дери къаллай жумушла тамамларыкъларын сюзгендиле. Ол а: «стартапланы» эмда жаш предпринимательлени онгдуруу, жаш специалистлени иш бла жалчытыу, бизнес бардырыргъа юйретген тренингле къурау эм башхала. Дагъыда жаш дизайнерлени «Стильный акцент» деген конкурсуна хазырланыуну юсюнден сёлешгендиле. Анга КъМКъУ-ну дизайн Институту эмда Мадина Саральп да къатышырыкъдыла.

КъМР-ни Жарыкъландырыу эм илму, сора Жаш тёлюню ишлери жаны бла министерстволары бла тюбешиуле къураугъа да уллу магъана бергендиле.

Организацияны жаш тёлю бла ишлерик бёлюмюн къурагъанда, «Иш кёллю Россейни» бизнес школуну выпускниклерин бирикдирирге умут этедиле. Аны уа, онтёрт жылны ичинде, беш жюз чакълы адам тауусханды. Ол санда жюз бла жарымы энчи бизнес-проектлерин жарашдырып, жетишимли къоруулагъандыла.