Коллегаларын сейирсиндирирча проектлери кёпдю

Кёп болмай Къабарты-Малкъар къырал университетде  тыш къыралланы келечилери да къатышып «Проектни къоруулауну энчилиги, жаякъ-бет,  пластика хирургия эм  стоматология бёлюмде 3D цифралы  технологияланы хайырланыу»  деген  илму-практика конференция болгъанды.   Аны институтну таматасы  Мустафаланы Магомет ачханды. 

Форум КъМКъУ-ну  технологияла бла инновацияла арасыны, Росздравнадзорну, РФ-ни  Саулукъ сакълау министерствосуну    стоматология бла  жаякъ-бет хирургия илму-излем институтуну,  Белорусьну къырал   медицина университетини, Шимал-Кавказны жаякъ-бет,  пластика хирургия эм стоматология институтуну,   «ТулаТЕХ» -дуния магъаналы илму-жарыкъландырыу  араны,  Москвада эстетика медицинаны  специалистлерини кючю бла бардырылгъанды.  

- Бусагъатда КъМКъУ-ну 90-жыллыгъына жоралап тюрлю-тюрлю акцияла бардырыладыла. Бюгюннгю семинар да аладан бириди. Жаякъ-бет хирургия  эм стоматология   институтну юсюнден айтханда, ол  къуралгъанлы алай кёп болмайды,  келир жылда анга  отуз жыл толлукъду. Быллай  семинарланы хайыры бла  специалистле  билимлерин  байыкъландырыргъа   эм сынамларын кючлерге да ахшы  онг табадыла,- дегенди Мустафа улу.  Ызы бла айтылгъан сёзлеге къошула, институтну таматасыны орунбасары  Владимир Виссарионов да сёлешгенди.  Ол да быллай  тюбешиуню магъаналыгъын белгилей: «Мен  патент аны хазырлагъан организациядан  эсе багъа тургъан   юлгюлени   билеме. Ол себепден патентни тюз жарашдырыу бек магъаналыды.  Быллай форумлада аны бла байламлы соруулагъа тынгылы къараллыгъы уа кёплеге ахшы себеплик этерикди»,-деп къошханды Владимир Алексеевич.

 КъМКъУ-ну илму тинтиуле эм инновацияла жаны бла  управленияны таматасы  Наталья Черкесова  «Стоматология бла жаякъ-бет хирургияда  полимер химия эм  аддитив технологияла» темагъа жоралап докладын окъугъанды. 

Быйыл жыл башланнганлы КъМКъУ-ну технологияла эм инновацияла  жаны бла арасында   34 жангы проект кёргюзтюлгенди. Аладан 23-сюне ХИМТЕХ жаны бла патент берилгенди.  Андан сора да, ноу-хау халда сакъланнган  башха къыйматлы ишле да кёпдюле.  Аны бла бирге университетни 90-жыллыгъыны аллында республиканы тарыхында  биринчи кере Светлана Хаширова башчылыкъ этген лаборатория «Биоразлагаемый материал» иши ючюн  Евразияны патент ведомствосуну  патентине тийишли болгъанды. 

Жыйылыуда башха   спикерле да тюрлю-тюрлю сейир темалагъа жоралап сейир докладлары бла шагъырей этгендиле.

 Форумну ахырында КъМКъУ-ну жалгъан акъыл  эм цифралы технологияла жаны бла институту жаш алимлени совети бла бирге мындан арысында быллай форумланы вузну башха бёлюмлеринде да бардырыргъа келишгендиле. Ол оюмну университетни  технологияла эм инновацияла жаны бла управлениясында да къабыл кёргендиле эм аны ючюн ишчи график къураргъа  чакъыргъандыла.

Магометланы Сулейман.
Поделиться: