«Кесими энчи жолум болса сюеме»

Спортну кюч тюрлюлеринде Тетууланы Жамалны жашы Камил жетишимли болгъанды, Россейни спортуну усатысыны нормативин толтургъанды. Студент заманында жаш эки жылны дзюдо бла кюрешгенди, алай спортну бу тюрлюсюне асыры кеч келгени себепли, эришиулеге къатышмагъанды. Жюреги пауэрлифтингге тартып, аскерде къуллукъ этгенинде, 23 жылында кюрешип башлагъанды. Частьда спортзал бар эди, бош заманларында жарау этерге онглары болгъанды.

Пауэрлифтингни энчилиги, спортну кёп башха тюрлюсюндеча болмай, аны бла бир 50 жылгъа дери профессионал халда кюреширге жарагъанындады. Алай мында жарау эталырча къарыуун адам 25 жылындан алып башлайды, саны къатмагъан сабийге мында жарау этген къоркъуулуду. Гитчелени сюеклери алыкъа жумушакъдыла, уллу ауурлукъла уа жиклеге, аркъа сюекге бек амандыла, грыжалагъа келтирирге, сюеклени къынгыр этерге боладыла. Абаданлагъа уа быллай затладан сакъланырча упражненияланы къаууму барды, эм игиси турнирде тагъылып, санланы, аркъа сюекни бир кесек создурургъанды. Ол Олимпиадагъа кирмегенликге, аны аслам адам сайлайдыла. Пэрлифтингге юч дисциплина киредиле: штанганы жатып тургъанлай кётюрюу, штанга бла чёгюп къобуу эм сюелип тургъанлай штанганы белинге дери кётюрюу. Камил штанганы жатып кётюрюуню айыргъанды.

Башха спортдача, мында да упражненияланы этгенде гёжефни тёгерегинде судьяла олтурадыла. Алагъа салам бересе, сора баш судья къолу бла кёргюзтюп эришиуню башларгъа эркинлик береди. Турнирледе пауэрлифтингни бу юч тюрлюсюне барысына да бирча къатышыргъа керек тюйюлдю, хар ким да кеси сайлагъан биринде сынашыргъа эркинди. Башхача айтханда, ала хар бири энчи спортча барадыла, аланы хар биринден чемпион болургъа онг барды. Штанганы битеу да тёрт кере кётюрюрге эркинлик бериледи, аладан ючюсю зачётха киредиле, бири уа спортчуну кесини энчи зачётуна жазылады. Хар кереден ауурлукъну ёсдюре бараса. Турнирде спортну устасы деген ат бериле эсе, спортну устасына кандидат алгъан ауурлукъдан азны салыргъа жарамайды, Камилни ауурлукъ къауумунда уа ол 135 килограммды.

Бир жанындан къарасанг, мында жангыз да билек кюч изленнгенча кёрюнеди. Болсада пауэрлифтингде адамны санлары иги бюгюлюрге керекдиле. Бек алгъа, ауурлукъ аякълагъа барады. Аладан белинге бла имбашларынга келе къолларынга ётеди, штанганы артда ол кюч бла тюртесе. Камил  кеси аллына юйреннгенин белгилерчады. «Биринчи кезиуледен окъуна кеси кесиме тренерме. Эрттеден кюрешген спортчулагъа къарай, аланы хар биринден ахшы юлгюле ала, программа жарашдыргъанма, алай бла юйреннгенме, акъырын-акъырын жарау эте тургъанма. Алай ол спортчуладан бирине ушаргъа итинеме деп айталмайма, кесими энчи жолум болса сюеме», - дейди ол.

Турнирлеге Тету улу аскерден къайтханындан сора къатышып башлагъанды. Биринчи эришиую Ростовда ётгенди - анда къытдыргъанды. Башхаладан кёбюрек ауурлукъну кётюргенликге, халатла жибергенини хатасындан алчы жерге чыгъалмагъанды. Алай ол юйрениулени бютюн къаты бардырыргъа андан да бек кёллендиргенди. Артха къайтханлай техника жаны бла айныууна эс бургъанды. Андан сора Нальчикде эришиуге къатышханды, анда алгъа 135, артда 140, ахырында уа 152,5 килограммны алалгъанды. Бу кёрюмдюле бла экинчи жерге чыкъгъанды. Аны ызындан турнирде ол спортну устасына нормативни толтурургъа борч салгъанды, аны ючюн а 157,5 килограммны кётюрюрге керек эди. Бу ауурлукъ анга къыйын кёрюнмегенди, экинчи кереден 160 килограммны алгъанды. Ючюнчю кереде 180 килограммны да кётюргенде, учупму кетеди дегенча, тынч болады. Тёртюнчю кере да базынады кесине, алай 185 килограммны ортасына дери кётюреди, андан ары уа бардыралмайды, арыгъаным чырмайды. Дунияны чемпионатында да, чурумла чыгъып, тёртючню жерни алгъанды, аллай даражалы эришиуде ол да ахшы кёрюмдюдю.