Бешжыллыкъ сабийден башлап таматалагъа дери

Республикада «Къоркъууузлукъну лабораториясыны» жангы арасы ишлеп башлагъанды. Ол ёсюп келген тёлюню къоркъуусузлугъун эм саулугъун сакълау мурат бла къуралгъан эмда «Билим бериу» миллет проектни «Хар сабийни да жетишими» проектини чеклеринде хазырланнганды.

 «Къоркъуусуз лабораторияны» «Веселый светофор» арасы  уа сабий чыгъармачылыкъны «Кюн шахар» академиясында ишлеп башлагъанды. Аны ачылыууна жарыкъландырыу эм илму министр Анзор Езаов, ГИБДД-ны КъМР-де Управлениясыны башчысыны орунбасары   Дмитрий Сухорученко къатышхандыла.

Ары келген сабийлеге уа жолда жюрюуню жорукъларын къалай билгенлерине конкурсла болгъандыла. Академияны «Альтернатива», «Гелиос» и «Голос» чыгъармачылыкъ биригиулеринде юйреннген жашчыкъла бла къызчыкъла кёргюзтген оюнла уа байрамгъа къууат бергендиле.

Жыйылыугъа къатышханлагъа арада экскурсия къуралгъанды. Анда уа жолда жюрюуню жорукъларын ангылатыу программала сингдирилгендиле. 

 Быллай инновация аралада жолда жюрюуню къоркъуусузлугъуну жорукъларына 5-жыллыкъ сабийледен башлап, таматалагъа дери дерсле къураргъа онгла бардыла. Бу мобильный комплекс  шахарны къайсы жерине, элине да барып, анда тийишли дерсле къурарча онглары болгъаны бла энчиди. Ол санда,  жолда жаяу жюрюгенде, улоугъа  миннгенде, тюрлю-тюрлю жол болумлада кесинги къалай жюрютюрге кереклисине юйретирча мадарла  бардыла. 

 Аны бла бирге сабийлеге юйден школгъа дери къоркъуусуз жолну къураргъа юйретедиле, къаллай шартлагъа энчи эс бурургъа кереклиси ангылатылады. Дагъыда ачыгъан адамгъа медикле жетгинчи биринчи болушлукъ бериуге юйретген  дерсле да къураладыла. Аякъ машинада жолгъа чыкъгъанда къоркъуусузлукъну жорукъларын ангылатхан   программа да сингдирилгенди.