Ариу болургъа сюе эсенг

Эриши тиширыу жокъду дунияда, деп айтылады белгили жырда. Ол кертиси бла да алайды. Тиширыу жаланда кесини тизгинин жыяргъа, юсюне-башына тюз къарай билирге керекди. Аны бир-бир амалларына косметолог Жеккеланы Елена юйретеди.

 Бетинде, къолларында да териси хар заманда да жумушакъ, таза, ызлыкъсыз болурун ким да сюеди. Алай ол къансыз, къургъакъ эмда чапыргъанча, зыбыр да кёрюне эсе, мычымай анга бир мадар этерге керекди. Бурун заманладан келген  талай амал сизге болушур деп ышанабыз.

Бетигизде чапыргъанны кетерип, таза этер ючюн быллай амалны хайырланыргъа боллукъду: жумуртханы сарысын, лимонну сууундан эки-юч тамычыны, гитче къашыкъ бла бир-эки  сют башны бирге къатышдырыгъыз да, ол какны бетигизге жагъыгъыз. Алай андан алгъа кёзлеригизни тёгерегине мамукъ неда кисей журунчукъла салыгъыз. Жарым сагъатдан сора бетигизни жылы суу бла жуууп, тазалагъыз.

Бетигизни териси сызлыкъ бола башласа, тюнгюлюп къалмай, биринчи кюнледен окъуна анга амал этигиз. Аллай амалладан бирине юйретейим: балны эки уллу къашыкъ бла бирин къайнай тургъан сууну тылпыуунда  жылытыгъыз, анга аллай бир ун, жумуртханы агъын да къошуп, иги чагъыгъыз. Сора ол чакъгъанны бетигизге жагъып, жарым сагъат тутугъуз да, жылы суу бла жуууп кетеригиз. Ызы бла сууукъ суу бла чайкъагъыз.

Бу амалны ыйыкъгъа бир кереден кёп хайырланыргъа жарамагъанын да эсигизде тутугъуз.