Жетишимлери кёллендиредиле

Бизни ёсюп келген тёлюбюз кесини жетишимлери бла хар заманда кёллендиргени, къууандыргъаны, айхай да, ахшы шартды. Ол жетишимле уа жаланда аланы кеслериникиле болуп къалмай, ата-аналарын, устазларын, бизни да ышандырадыла.

Белгилисича, орус тил сабийле барысы да борчлу халда берген Бир къыраллы экзаменледен бириди. Озгъан окъуу жылда андан саулай да республикадан онеки адам алгъандыла жюз балла. Аладан бири уа Гыжгыланы Салимады.

Ол Яникойну Байсолтанланы Алим атлы битеулю билим берген школунда окъугъанды. Орус тилден бийик кёрюмдю болдургъанындан сора да, къызчыкъ математикадан «беш» алгъанды. Орус литературадан бла ингилиз тилден да 80-ден аслам баллагъа тийишли болгъанды.

- Орус тилден жюз болмаса да, токъсан баллны уа алырма деп, алгъадан да ышаннганма. Андан устазыбыз Жолабланы Мадина Магомедовнагъа ыразылыгъымы билдирирге сюеме. Бизни окъутуугъа уллу къыйын салгъанды, - дегенди ол бизни бла къысха ушагъында.

Салима бийик балла алгъаныны хайыры бла аслам жерге окъуугъа да киргенди. Алай а, республикада къалыргъа излеп, бюгюнлюкде КъМКъУ-ну тыш къыраллы филология бёлюмюню студентиди. Ол окъууун жаратханын, мында билимли, окъуулу преподавательле ишлегенлерин айтады. Университетни бошаса, ингилиз, орус тилле бла да филология излемле бардырыргъа сюеригин да билдиргенди.

Алыкъа Салима биринчи курсда эсе да, ол билим алып, ёсюп келе тургъан тёлюню юйретир, кеси да мындан арысында да жетишимли болур деп ышанабыз.

Мокъаланы Зухура.
Поделиться: