Жигитликлери унутуллукъ тюйюлдю

Тырныауузда Эсгериуню майданында 2005 жылны 13 октябринде ич ишлени органларында къуллукъ эте тургъанлай ёлгенлеге жораланнган бушуулу митинг болгъанды. Анга  Элбрус муниципал районну жер-жерли администрациясыны башчысыны къуллугъун толтургъан Сотталаны Къурман, Жер-жерли самоуправленияны советини таматасы Тохаланы Хыйса, КъМР-ни Парламентини депутатлары Ахматланы Мурадин бла Хасаитланы Лиза, жамауат эмда билим бериу организацияланы, культураны, спортну эмда саулукъ сакълауну келечилери, Россейни МВД-сыны Элбрус районда Бёлюмюню энчи къаууму  бёлюмню таматасы Шауаланы Арсенни башчылыгъында къатышхандыла, школчула, жамауат да жыйылгъандыла.

Митингде сёлешгенле онжети жыл мындан алгъа болгъан ачыулу ишлени эсге тюшюргендиле, Бёлюмде къуллукъ эте тургъанлай, мамырлыкъ ючюн жашауларын аямагъан полициячылагъа махтау бергендиле. Районда право низамны сакълаучу органларыны 17 келечиси къуллукъ борчларын толтургъан кезиуде ёлгендиле.

 - Террорчулукъ эмда экстремизм бла байламлы не тюрлю ишлени да болдурмаз ючюн биз барыбыз да къолубуздан келгенни аямазгъа керекбиз. Биз жигитлерибизни алларында баш урабыз, ала бла ёхтемленебиз. Аланы атлары бир заманда да унутуллукъ тюйюлдюле. Алагъа ёмюрлюк махтау! - дегенди Тохаланы Хыйса.

Жыйылгъанланы алларында дагъыда Хасаитланы Лиза бла Шауаланы Арсен сёлешгендиле.

Митингге къатышханла къуллукъ борчларын ахырына дери толтургъанланы бир минутну шош сюелип эсгергендиле, аланы эсгертмелерине гюлле салгъандыла, деп билдиргендиле бизге Элбрус муниципал районну жер-жерли администрациясыны пресс-службасындан.