Электрокюч урлагъан тутулгъанды

Электрокючню багъасын тёлемей хайырланыргъа тюзелгенлени ачыкълау ишни энергетикле дайым бардырадыла. «Россети Шимал Кавказ» компанияны бизни республикада бёлюмюнде - «Каббалкэнергода» айтханларына кёре, кёп болмай аны специалистлери, правону къоруулаучу органланы келечилери бла бирге рейд бардырып, энтта да бир аллай шарт тохташдыргъандыла.

Ол а къалай болгъанды: Чегем райондан энчи предприниматель, кеси да пеплоблокла чыгъарыу бла кюрешген, производствосуну файдалыгъын игилендирир умутда, счётчик ишлемезча этип, 1,7 миллион сом багъасына электрокюч урлагъанды. Ток бла тергегенде, ол 262 минг киловатт болады. Аны ючюн ол адам тазир тёлерикди. Дагъыда уголовный жууапха тартылыргъа боллукъду. Материалла ич ишлени органларына берилгендиле.

Компанияда къайтарып эсгередиле, электрокюч урлагъан инсан административ эмда уголовный жууапха тартыллыкъды. Дагъыда КоАП-ны 7.19 статьясына тийишлиликде, сетьлеге соргъан-сурагъан этмей къошулгъанлагъа эмда токну эсеплеучю приборсуз хайырланнганлагъа тазир салынырыкъды. Аны ёлчеми: гражданлагъа – 10-15 минг сом, предприятиялагъа  бла организациялагъа – 100-200 минг сом. Иш уголовный жууаплылыкъгъа жетсе, тийишли кодексни 165 –чи статьясында айтылгъаннга кёре, инсанны эки жылгъа дери олтуртургъа боллукъдула.