Соруулагъа жууапла бергендиле, законланы ангылатхандыла

Сюд приставланы федерал службасыны КъМР-де Управлениясыны къуллукъчулары мобилизациягъа тюшген 250 инсанны сорууларына жууапла бергендиле. Сёз борчлары болгъанлагъа ахчаны къайтартыу жаны бла  бегимлени кючлерин тохтатыуну юсюнден баргъанды, деп билдиргендиле бизге ведомствону пресс-службасындан. 

«Толтуруу производствону юсюнден» федерал законну 40-чы статьясыны 2-чи кесегине  тийишлиликде, РФ-ни Сауутланнган кючлерине, башха аскерчи къауумлагъа къуллукъ этерге чакъырылгъан инсандан анга ачылгъан толтуруу бегимни кючюн тохтатыуну юсюнден тилек келсе, приставла аны къабыл кёрюрге боллукъдула.

Мобилизация бла аскерге къуллукъ этерге чакъырылгъан инсанлагъа таплыкъгъа республиканы сюд приставлары чакъырыу бардырылгъан жерледе ишлегендиле. Ала   соруулагъа жууапла бергендиле, законланы ангылатхандыла,  терслеу бегимлени кючлерин тохтатыуну юсюнден заявленияланы алгъандыла.

Эсигизге салайыкъ, мобилизация бла аскерге чакъырылгъан инсанны заявление жазаргъа онгу жокъ эсе, аны орунуна жууукълары толтурургъа  эркиндиле.