Бу кюн Венера планетаны тинтиуде

1967 жылда 18 октябрьде «Венера-4» деген алам станция Венера планетагъа къонуп, аны юсюнден информация жиберип башлагъанды. Андан бери 55 жыл озгъанды.

Венера планета кюннге Жерден эсе жууукъ турады. Аны башында хауасы болуруну юсюнден 1761 жылда Михаил Ломоносов айтхан эди. Эки жюз жыл озгъандан сора, аны ол планета таба алам станцияла учуп башлайдыла. Аны юсюнден къадар информация бередиле.

1960 жылда 4 июньда СССР-ни правительствосуну «О планах освоения космического пространства» бегими чыгъады. Анда айтылгъаннга кёре, Марсха бла Венерагъа жетерча ракета ишлерге борч салынады.

Быллай биринчи ракета, юсюнде автоматика станциясы бла, 1961 жылда 12 февральда кётюрюледи. Ол аламгъа чыгъып, Жерни тёгерегинде бир кере учуп, «Венера-1» станцияны ол планета таба жибереди.

Быллай аппаратланы къурагъанда, конструкторла Венерада хауаны басымы неллай бир болгъанын билмей эдиле. «Венера-1» ол планетагъа 100 минг километр жууукъда учуп кетгенди. Ызы бла баргъан «Венера-2» станция уа 24 минг километрге жууукълашханды. Ол 1966 жылда болгъан ишди.

Ол жыл окъуна биринчи майда «Венера-3» аппарат планетагъа къонады. Алай андан информация жибералмай къалады. Ызы бла, 1967 жылда 12 июньда ары «Венера-4» станцияны жибередиле. Ол 18 октябрьде планетагъа къонуп, хауасыны къурамын тергейди, радиация эмда мукъуладис болмагъанларын да кёргюзтеди.

Андан сора Венераны тинтиу жетишимли барып башлайды. Быллай аппаратла 1970-1983 жыллада ары жетип, биринчиден акъ-къара, артда уа тюрсюнлю суратла жиберген эдиле. Ызы бла радиолокация амал бла планетаны картасын да жарашдыргъандыла.

1984 жылда декабрьде Совет Союз «Вега-1» бла «Вега-2» аппаратланы ашырады аламгъа. Ала Венераны бла Галлей атлы кометаны тинтирге керек эдиле. Жарым жылдан сора станцияла планетагъа жетип, аны юсюне энчи аппаратларын тюшюргендиле.

Ма алай, алам станцияланы хайырындан Венера планетаны алимле жик-жиги бла тинтип чыкъгъандыла.