Эртте-кеч болса да, тёлерге тюшерикди

Къыралда кёп къатлы юйлени тынгылы жангыртыу программа ишлейди, ол   2043 жылгъа дери тамамланырыкъды. Аны чеклеринде регионлада жашау журтланы фонду тапландырыллыгъы белгиленеди.

КъМР-де  кёп къатлы юйлени тынгылы жангыртыу программаны тамамлаугъа  ол жаны бла регион оператор жууаплыды. Бу  коммерциялы болмагъан фондну башчысы Къулийланы Мустафир билдиргенича, программаны жашауда бардырыу магъаналы сорууладан бириди.  Программа къысха эм узакъ болжаллыды.

-Биринчиси юч жылгъа жарашдырылады эмда быйыл бошалады. Эсеплени юслеринден айтханда, озгъан жыл 83 кёп къатлы юйде бардырылгъандыла  тынгылы жангыртыу жумушла. Анга къоранчла 400 миллион сомдан асламдыла. Быйыл а къурулуш материалла багъа болгъанлары ючюн къоранчла кёбейгендиле,-дегенди ол бизни бла ушакъда.

Мустафир Ахматович 2017 жылдан бери жангыртыу жумушлагъа тёлеуле тюрленмегенлерине да бургъанды эс.  Бюгюнлюкге аны ёлчеми 6 сом 22 капекди. Алай  КъМР-ни Правительствосу  аны тюрлендирирге оноу этгенди. Алай бла 2023 жылдан башлап тарифле 15 процентге кёбейтилгендиле эмда бир квадрат метр журтха  7 сом 15 капекге жетгенди.

Бюгюнлюкде ГИС ЖКХ бирикдирилген информация система ишлейди. Алай  бирде анга терс тарихле тюшгенлерине эс бургъанды бизни ушакъ нёгерибиз. Ол санда кёп къатлы юйлени адреслери кемчиликле бла жазылгъан кезиуле да бардыла. Аны ючюн а юйде жашагъан адамланы санын, фатарланы кенгликлерин тюз жарашдыргъанда,  квитанцияланы юлешгенде  чырмаула боладыла. 

  - Жер-жерли власть органладан тилеригим, бу жаны бла жумушланы бирге биригип бардырыргъа керекди. Ол санда мекямланы адреслерин жангыртыу, программаланы шёндюгю болумлагъа келишдириу жаны бла мадарланы тамамларгъа керекди,-дегенди ол.

Республикада уа кёп къатлы юйлени тынгылы жангыртыу жумушла ючюн инсанла заманында тёлемей, уллу борч жыйылгъанды. Программа ишлеп башлагъан кезиуден  бери ол миллиард сомдан аслам болгъанды.  Ахчаны жыйышдырыу жаны бла мадарла бардырыладыла, ол санда сюд органланы болушлукълары бла. Орта эсеп бла бир айгъа сюдню къараууна 2 мингден аслам документ  бериледи. Бюгюнлюкде сюдле тинтип, оноуну чыгъаргъан ишлени саны  16 мингден асламды.

- Ахчаны жыйышдырыу мадарлагъа уллу магъана бериледи. Былтыр Правительство бизни тилеклерибизни тюзге санап, фондну ишчилерини санын кёбейтгенди. Ол а праволу бёлюмню кючлерге онг бергенди. Аны айтханым,  ахчаны жыйышдырыу иш тохтатылмайды, инсанла, эртте-кеч болса да, аны берирген кереклисин ангыларгъа керекдиле. Жарсыугъа, адамла бу ахча неге жыйылгъанын алыкъа ангыламагъандыла. Айтырыгъым, инсанла этген тёлеуле аланы юйлерин тапландырыугъа къоратылады. Фондну ишчилерине андан хакъ тёленмейди, бизни кереклеге бир капек да алынмайды. Фондну кереклерине ахчаны бюджетден тёлейдиле,  конвертлени сатып алыргъа  ахчаны окъуна къырал береди,-дегенди фондну башчысы.

Жарсыугъа, ал кезиуде жамауат программаны ангыламай, тёлемей, борчла жыйылгъандыла. Къулий улу билдиргенича, аллайлагъа себеплик этиледи. «Келишим жарашдырып, борчну жылны ичинде айлагъа юлешип тёлерге онг барды. Ол тынчыракъ боллукъду. Алай борч кечилмейди. Ол угъай, болжалланы бузгъанлагъа тазир салынады»,-дегенди ол.

Тикаланы Фатима.
Поделиться: