Хар нени да мардасын тергер ючюн

Жыл сайын 14 октябрьде, битеу дунияда Стандартланы кюнюн белгилейдиле. Анга энтта да Стандартизацияны битеудуния кюню (World Standards Day) деп да айтадыла. Аны бирикген стандартланы магъанасы уллу болгъанын адамлагъа билдирир хыйсап бла къурагъандыла. Дагъыда жашауларын, профессионал усталыкъларын аллай жууаплы эмда керекли ишге берген специалистлени къыйынларын белгилерча.

Бу Кюнню тарыхы 1946 жылда, стандартизация жаны бла миллет организацияланы конференциясы Лондонда ачылгъаны бла башланнганды. Жыйырма бла беш къыралдан, ол санда СССР-ни атындан да аны ишине 65 делегат къатышханды. Конференцияны ахырында стандартизация жаны бла халкъла аралы организация (ИСО) къураргъа оноу этиледи. Бюгюнлюкде анга 164 къыралны организациялары киредиле.

1970 жылда, ИСО-ну башчысы Фарук Сунтер (Тюрк) 14 октябрьде битеу дунияда Стандартланы Кюнюн белгилейик деп чакъырады, стандартизацияны жер башында экономикагъа магъаналылыгъын кёргюзтюрча.

Стандартизацияны баш магъанасы - къайсы ишде да анга къатышханланы хар бирине да тап келген, къоркъуусузлукъну, аяулукъну излемлерин да эсге алып, аллай  жорукъланы жарашдырыуду. Сёз мында илмуда, транспортда, техникада, промышленностьда, эл мюлкде, къурулушда, маданиятда, саулукъ сакълауда, сатыу-алыуда эмда кёп башха бёлюмледе энчи бир продукцияны, мардаланы, амалланы, сёзлени, белгилени юслеринден барыргъа боллукъду.

Къайсы производствону да айнытыу атламлары кёбюсюнде стандартизациягъа кёре боладыла. Илмуну, техниканы, жашауда сынамны эм жангы жетишимлерине таянып ол бу сфераланы алгъа тюртген кючледен бириди. Къабарты-Малкъарда бу жумушланы «Стандартизацияны, метрологияны эм сынамланы къырал регион арасы» федерал бюджет учреждение жалчытады.

Айтханыбызча, бу байрамны хар жыл сайын бир жангы темагъа жоралайдыла. Аны юч организация оноулашып тохташдырады: стандартизация жаны бла халкъла аралы организация (ИСО), Халкъла аралы электротехника комиссия (МЭК) эм Халкъла аралы электросвязь союз (МСЭ). Анга кёре хар кере да бу Кюнню бир тюрлю чакъырыу бла белгилейдиле. Быйыл ол быллайды: «Ышаннгылы айнытыуда умутлагъа жетерча стандартла».