Казбек Коков «Жолла 2022» деген халкъла аралы кёрмючге къатышханды

Жол мюлкде уруннганланы кюнлерини аллында Россей Федерацияны Транспорт министерствосуну болушлугъу бла Къазанда «Жолла 2022» деген халкъла аралы энчи кёрмюч бардырылгъанды. Анга Россейни жол- мюлк транспорт комплексини келечилери эм ол жаны бла халкъла аралы экспертле, илмуну эм бизнесни адамлары къатышхандыла.

КъМР-ни Башчысы Казбек Коков коллегалары - россейли регионланы башчылары бла бирге «Жол мюлкню тутхучлу айнытыу» деген пленар  кенгешге эм  Россей Федерацияны Къырал советини «Транспорт» комиссиясыны жыйылыууна къатышханды.

Россей Федерацияны Президенти Владимир Путин пленар жыйылыугъа къатышханлагъа алгъышлау сёзюн жибергенди, ол анда адамланы жашауларыны качестволарын игилендириуде, къыралны экономикасын эм хар регионну айнытыуда жол мюлкню магъанасын энчи чертгенди. Къыралны башчысы жол мюлкде уруннганланы ишлерине бийик багъа бергенди. РФ-ни Правительствосуну Председатели Михаил Мишустин видео бла этген сёзюнде россейли жолланы андан ары айнытыуну юсюнден айтханды. Президентни буйругъу бла беш жылны ичинде жол мюлкню айнытыу бла байламлы планнга кёре, ары бир ненча минг мероприятия киреди. Битеу да белгиленнген ишлени тамамларгъа 13 триллион сом бёлюннгенди, ол ырысхылагъа 100 минг километр жолну ишлерге эм жангыртыргъа боллукъду. Къыралны ичинде Санкт-Петербургдан тебиреп Владивостокга  дери  уллу транспорт жолла ишленирикдиле.

 РФ-ни Правительствосуну Председателини орунбасары  Марат Хуснуллин жыйылыугъа къатышханланы аллында сёлеше, Росавтодор бла этиллик келишимге хар регионда беш жылны ичинде тамамланырыкъ ишлени планы кирликди. Анда муниципал эм регион жолланы айнытыугъа аслам эс буруллукъду, дегенди ол.

Марат Хуснуллин жол мюлкге толу оноу эм тамамланнган ишлеге тынгылы контроль этерча бирикген система къураргъа кереклисин айтханды.   Жыйылыугъа къатышханлагъа жол мюлк бёлюм санкцияланы кезиуюнде ишлени къалай бардырыргъа кереклисин айтханды. Дагъыда магъаналы къырал жолланы айнытыугъа, стратегиялы къырал программаланы къыйматлы хайырланыргъа, жол мюлк фондлагъа, кадрла бла соруулагъа эм транспорт жаны бла билим бериу системаны айнытыугъа, автотуризм эм аны бла байламлы жоллада онгланы къураргъа тийишлисича эс бурургъа кереклисин айтханды. 

Жолчула болдургъан бек уллу жетишимге жоллада авариялагъа тюшгенлени саны иги кесекге азая баргъаны саналады, ол саннга адамла ёлген кезиуле да киредиле. Ол болум жолла кёпден-кёп бола эм автомашиналаны жюрюулери терклене баргъанларына да къарамай сакъланады. Быллай ахшы шартла арт эки жылда Къабарты-Малкъарда бардыла.

Марат Хуснуллин «Къоркъуусузлу качестволу жолла» миллет проект 2035 жылгъа дери бардырыллыкъды, дегенди. Ол проектни эм башха жол программаланы чеклеринде Къабарты-Малкъарда юч жылны ичинде норматив халгъа 600 километрге жууукъ автомобиль жол келтирилгенди. Быйылгъы жылда башда сагъынылгъан халгъа 170 километр регион эм жер-жерли жол келтирилирге керек эди, ол санда 134 метр кёпюрле тургъан жерле эм 70 километрде чыракъла жанарча этилликдиле. Белгиленнген ишлени асламысы тамамланнгандыла, объектлени асламысы болжалдан алгъа хайырланырча болгъанды.

 «Жол мюлкде къурулуш ишлени бардырыу регионну экономикасын айнытыуда уллу магъананы тутады. 2023 жылгъа бизни республикада жол ишлени бардырыугъа 4,4 миллиард сом бёлюнюрюкдю. Миллет проектни чеклеринде 70 километр автомобиль жол эм 261 километр кёпюрле болгъан эм ётген жерле норматив халгъа келтирилликдиле. Дагъыда регионну эсебинде болгъан 30 километр автомобиль жолну эки жанында чыракъла орнатыллыкъдыла. Андан сора да, «Регион эм жер-жерли магъанасы болгъан автомобиль жолланы айнытыугъа себеплик этиу» федерал проектни чеклеринде 23,8 километр автомобиль жол эм «Эллени комплексли айнытыу» къырал программагъа кёре алты элде 18,6 километр жол тап халгъа келтирилликди. Гитче шахарларыбызны орамларында тапландырыу ишлени андан ары тохтатмай бардырлыкъбыз», - дегенди Казбек Коков жыйылыуну юсюнден кесини оюмун айта. Аны юсюнден КъМР-ни Башчысыны бла Правительствосуну пресс-службасындан  билдиредиле.

 

Поделиться: